HEADLINE, MUNISÍPIU, VIQUEQUE

DNTT Viqueque distribui ona subsídiu voucher kombustível ba transporte públiku

DNTT Viqueque distribui ona subsídiu voucher kombustível ba transporte públiku

Bus ne’ebé halo movimentu Dili-Viqueque para iha jardín 1959 Viqueque, tersa (05/04). Imajen Tatoli/Vitorino Lopes da Costa

DILI, 27 jullu 2022 (TATOLI)—Diresaun Nasionál Transporte Terreste (DNTT) Viqueque distribui ona voucher ba transporte públiku iha munisípiu Viqueque.

“Horiseik ami hahú distribui voucher ba ita-nia transporte públiku anguna sira hamutuk 20 maka simu uluk ona voucher ba fulan-jullu nian no orsida lorokraik ami kontinua distribui ba ita-nia transporte públiku sira iha munisípiu Viqueque,” Diretór Nasionál Transporte Terreste munisípiu Viqueque, Elbino da Cruz, hateten ba Agência Tatoli, via telefónika, kuarta ne’e.

Tuir dadús hosi DNTT, transporte públiku ne’ebé rejista iha DNTT Viqueque kompostu hosi anguna, mikrolet no bus hamutuk 187.

“Transporte públiku sira ne’ebé seidauk simu, ami sei fahe hotu fulan-jullu nian, tanba fulan-agostu transporte públiku sei kontinua subsídiu kombustível,” nia akresenta.

Notísia relevante: DNTT lansa voucher kombustível ba transporte públiku Viqueque semana oin

Daudaun ne’e, Governu kontrata ona estasaun kombustível rua hanesan empreza Sejarina Unip, Lda no empreza Borala Unip, Lda iha munisípiu Viqueque hodi oferese kombustível ba transporte públiku.

“Daudaun ne’e estasaun kombustível Sejarina maka oferese uluk, enkuantu Borala sei kompleta dokumentu hafoin oferese kombustível ba ita-nia transporte públiku sira,” nia tenik.

Nune’e, nia husu ba transporte públiku sira hodi matein nafatin tarifa ne’ebé antes ne’e implementa ona.

Transporte públiku hamutuk 167 maka seidauk simu voucher, nune’e DNTT sei fahe voucher subsídiu ba fulan-jullu iha semana ida-ne’e ba benefisiáriu sira.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!