HEADLINE, KAPITÁL, NASIONÁL

Estatutu IGE, I.P alteradu iha reuniaun KM

Estatutu IGE, I.P alteradu iha reuniaun KM

Ekipa IGE, I.P mobiliza hela ekipamentu pezadu hodi normaliza estrada iha área Galisapulu, iha suku Lahomea, postu administrativu Maliana, munisípiu Bobonaro. Imajen Tatoli/Sérgio da Cruz

 DILI, 27 jullu 2022 (TATOLI)– Governu liuhosi reuniaun Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Ministru Obra Públika (MOP), Abel Pires da Silva, ba alterasaun dahuluk ba dekretu-lei númeru 11/2006 loron 12 abril, kona-ba kriasaun Institutu Jestaun Ekipamentu, Institutu Públiku (IGE, I.P, sigla portugés) Timor-Leste no aprovasaun ba ninia estatutu.

“Objetivu alterasaun ne’e atu kompatibiliza estatutu IGE, I.P nian, ne’ebé define ona iha dekretu-Llei organizasaun administrasaun direta no indireta, ho Orgánika VIII Konstitusionál no konfere kompeténsia foun sira ne’ebé sei permite aumenta rekursu hodi hadi’a servisu públiku ne’ebé Estadu fó ba sidadaun sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu.

Notísia relevante:  MOP no IGE sei sosa tan mákina pezadu hamutuk unidade 15

Portavós Governu dehan, daudaun atribui hela kompeténsia sira ne’ebé IGE, I.P halo durante tinan barak hodi apoiu situasaun oioin ne’ebé presiza intervensaun lalais hodi hadi’a filafali tráfegu rodoviáriu ho seguru no evita inundasaun liuhosi limpeza no normalizasaun mota sira.

“Instituisaun ne’e iha ekipamentu, koñesimentu tékniku no esperiénsia iha terrenu hodi bele realiza, hanesan parte ida hosi sira-nia atribuisaun, la’ós de’it tarefa sira ne’ebé prevee ona hanesan jestaun ekipamentu pezadu sira maibé mós halo atividade manutensaun ba estrada sira, hasai rai-henek no hamoos estrada sira, hasai rai-henek no hamoos mota sira, inklui halo estabilizasaun ba mota-ninin no bareira sira,” nia akresenta.

Ho diploma ne’e, estabelese ona figura Diretór Ezekutivu, ho kompeténsia ba diresaun no jestaun servisu IGE nian tuir diretrize sira hosi ninia Konsellu Administrasaun inklui atribui mós kompeténsia ba Prezidente Konsellu Administrasaun IGE, I.P hodi bele aprova despeza, bele autoriza, aprova aprovizionamentu no bele asina kontratu sira tuir lei.

Governu deside kria IGE iha tinan 2005 hanesan institutu públiku ho autonomia administrativa, finanseira no patrimóniu própriu ne’ebé responsável ba boa jestaun no esplorasaun ba bens iha ámbitu prosekusaun dezenvolvimentu infraestrutura no nesesidade ba serbisu administrasaun públika.

Daudaun, institutu públiku ne’e iha faze transforma ba empreza públika, atubele halo atendimentu ba sidadaun ho efisiénsia no efikásia no iha tempu hanesan bele rekolla reseita ba kofree Estadu.

Daudaun ne’e ekipa IGE, I.P destaka ona iha munisípiu sira hanesan  Baucau, Viqueque, Lautém, Ainaro, Covalima, Bobonaro, Aileu, Liquiçá, Dili, Manatuto, liuliu Natarbora ne’ebé presiza tebes ekipamentu.

IGE, I.P iha ona esperiénsia kona-ba poupansa orsamentu no rekolla reseita, tanba konsege poupa osan Estadu millaun $4, ho intervensaun direta ba terrenu hodi rezolve infraestrutura públika ne’ebé hetan estragu tanba dezastre naturál.

Iha tinan 2020 institutu konsege rekolla reseita $160.000, maibé hosi tinan  2019 to’o 2020 rekolla reseita millaun $2, hosi kompañia privada ne’ebé aluga mákina pezadu hodi hala’o serbisu iha terrenu, ne’ebé empreza sira selu direta iha Banku.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!