DILI, 27 jullu 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu dektetu-lei, ne’ebé aprezenta hosi Ministru Administrasaun Estatál (MAE), Miguel Pereira de Carvalho no Ministru Edukasaun Juventude no Desportu (MEJD), Armindo Maia, kona-ba programa merenda eskolár.
“Programa merenda eskolár nu’udar subsídiu ne’ebé fó iha ámbitu asaun sosiál eskolár, ne’ebé ho objetivu hodi asegura direitu han loron-loron ho hahán saudável, ekilibrada no indispensável ba dezenvolvimentu no insentiva partisipasaun labarik sira iha edukasaun pré-eskola no iha ensinu báziku, públiku no partikulár hodi integra ba rede públika ne’ebé situa iha rai-laran hodi promove ninia prosesu ensinu no aprendizajen,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu.
Notísia relevante: Governu prevee orsamentu millaun $8,4 hodi realiza programa merenda eskolár
Liuhosi programa ne’e, sei fornese hahán ba alunu sira estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku nian ne’ebé situa iha rai-laran.
“Subsídiu sira ne’ebé fó iha programa ne’e maka iha natureza subvensan públika sira no asume ho forma subsídiu alimentár, ne’ebé hato’o espesiál ba sosa hahán ka subsídiu administrativu, ne’ebé ho objetivu atu apoia despeza sira ho enkaregadu administrativu sira impaktu hosi ezekusaun programa ne’e,” Portavós Governu akresenta.
Nune’e, implementadór programa merenda eskolár mak estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku, ne’ebé nia fatin iha territóriu nasionál no organizasaun komunitáriu sira, grupu komunitária ka hanesan, liuliu asosiasaun sein personalidade jurídika.
Montante subsídiu ne’ebé atribui iha ámbitu programa merenda eskolár fiksa iha $0,42 ba kada loron hanorin no ba kada alunu.
Ministru Prezidénsia Konsellu Ministru dehan, Governu halo luan tan programa merenda eskolár, aumenta valór sa’e ba $0,42 séntimu kada estudante, ninia proses liuliu iha área rurál sei adjudika direta maibé iha área sentu urbanu sei rekolla kotasaun.
“Programa merenda eskolár ne’e preokupasaun boot Primeiru-Ministru nian, hakarak ita-nia oan sira iha asesu ba hahan ne’ebé di’ak, kontribui ba sira-nia saúde mós hasa’e sira-nia kapasidade atu aprende tanba iha munisípiu balun labarik la’o dok hosi uma ba eskola, tanba ne’e iha eskola sira sei iha oportunidade atu hetan hahan durante eskola loron nian”, nia salienta.
Jornalista : Antónia Gusmão
Editora : Julia Chatarina
