EKONOMIA, HEADLINE, INTERNASIONÁL

Governu aprova proposta rezolusaun PN ratifika akordu kompaktu MCC

Governu aprova proposta rezolusaun PN ratifika akordu kompaktu MCC

Logotipu MCC. Imajen/Espesiál

DILI, 27 jullu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu ba proposta rezolusaun Parlamentu Nasionál (PN) ba ratifikasaun akordu kompaktu Millennium Challenge Corporation (MCC).

Proposta ne’e aprezenta hosi Ministru Prezidénsia Konsellu Ministru (PCM, sigla portuges), Fidelis Manuel Leite Magalhães.

“Pakote kooperasaun ne’e asina ona iha loron 19 jullu liubá no sei ezekuta durante tinan-lima no iha montante globál millaun $484. Tanba asina ona no lori mai Konsellu Ministru aprova ona, nune’e sei haruka liu ba Parlamentu Nasionál atubele halo ratifikasaun,” Portavós Governu, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.

Notísia relevante: Timor-Leste sei selebra akordu ho MCC implementa programa redús kiak

Programa ne’e sei haree ba komponente prinsipál rua hanesan hadi’a sistema bee, saneamentu no drenajen no ida seluk iha área edukasaun no formasaun nian, ho objetivu atu hamenus kontaminasaun ba bee-moos no bee iha rai-okos ne’ebé bele fó moras, impede moris di’ak no saúde ba labarik no adultu sira.

Aleinde ne’e, projetu ne’e inklui konstrusaun ba fábrika ida hodi halo produsaun dezinfetante kímiku ba abastesimentu bee iha sidade, konstrusaun ba sistema sentrál dahuluk bee reziduál nian iha país, hadi’a rede drenajen ba kapitál Dili no munisípiu viziñu haat, reforma polítika no institusionál sira nune’e mós mudansa sosiál no komportamentu hodi hadi’a sistema saneamentu báziku no jestaun bee iha nível doméstiku.

Ida seluk, ho objetivu atu hadi’a kualidade ensinu sekundáriu ba alunu sira, liuhosi hadi’a ensinu sekundáriu no lideransa eskolár sira.

“Projetu ne’e sei estabelese instituisaun formál sertifikasaun formasaun nian dahuluk ba formasaun profesór sira iha nasaun ne’e, sei hanaran ‘Sentru Exelénsia’, ne’ebé sei fó formasaun no sertifikasaun profisionál ba profesór no líder ensinu sekundáriu iha tempu ohin loron no aban bainrua,” Governante ne’e subliña.

Investe iha formasaun ba profesór sira, sei prodús eskola sekundária sira ne’ebé di’ak liu, ho alunu sira  ne’ebé bem preparadu  ba merkadu serbisu ka ba edukasaun pós sekundária, nune’e aumenta ninia kapasidade hodi kontribui ba kreximentu ekonómiku país nian.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!