DILI, 27 jullu 2022 (TATOLI)-Governu liuhosi reuniaun Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães, kona-ba suplementu remuneratóriu ba funsionáriu públiku no ajente administrasaun públiku, ne’ebé hala’o funsaun hanesan formadór iha administrasaun públika.
“Projetu dekretu-lei ne’e ho ninia objetivu estabelese rejime ne’ebé bele fó retribuisaun finanseira ba responsabilidade no komplesidade ne’ebé boot ba funsionáriu no ajente públiku administrativu sira nian ne’ebé envolve iha realizasaun asaun formasaun jerál ka espesializada,” Ministru Fidelis relata hafoin reuniaun ezekutivu iha Palásiu Governu.
Notísia relevante: Ajente administrasaun destaka gabinete ministeriál simu suplementu remuneratóriu ba servisu extraordináriu
Suplementu foun ida-ne’e mai ho inisiativa hakarak aproveita di’ak liu kapasidade formadór ne’ebé oras ne’e daudaun iha ona administrasaun públika nasionál nia laran, nune’e bele kontribui ba rasionalizasaun rekursu nasionál sira.
Nune’e, valór suplementu remuneratóriu ba kada oras ba formadór nian sei fiksa tuir grau kompleksidade funsionál karreira formandu nian, maibé valór labele liu $50.
Entidade ne’ebé responsável ba pagamentu suplementu ida-ne’e mak entidade ne’ebé responsável hodi halo formasaun ka entidade sira ne’ebé selu.
“Liuhosi dekretu ne’e mak sei deside, oras hira, semana ida no fiksa montante, maibé montante ne’e labele a’as liu $50,” nia akresenta.
Jornalista : Antónia Gusmão
Editora : Julia Chatarina
