iklan

EKONOMIA, HEADLINE

Governu no USAID aprezenta dezenvolvimentu Cristo Rei ba setór privadu

Governu no USAID aprezenta dezenvolvimentu Cristo Rei ba setór privadu

Fatin turizmu, Cristo Rei. Imajen/timor-leste.tl

DILI, 27 jullu 2022 (TATOLI)—Governu liuhosi Ministériu Finansa (MF) hamutuk ho Estadu Unidu Amérika (EUA) liuhosi Ajénsia Estadu Unidu ba Internasionál Dezenvolvimentu (USAID, sigla inglés), kuarta ne’e, aprezenta projetu Parseria Públiku Privadu (PPP) no dezenvolvimentu Cristo Rei ba setór privadu.

Vise-Ministru Finansa, António Freitas, hateten, objetivu hosi inisiativa ne’e mak hakarak fahe informasaun ba setór privadu sira kona-ba dezenvolvimentu ba projetu ne’e tanba antes ne’e pasu konkursu tenke iha konsultasaun.

“Nune’e sira iha koñesimentu tanba projetu ne’e rasik sei hala’o liuhosi aprovizionamentu sira mak sei prepara buat hotu hanesan halo dezeñu, finansiamentu, konstrusaun no sira mak sei opera,” Vise-Ministru Finansa informa ba Agência Tatoli, iha salaun MF, Aitarak-Laran.

Notísia relevante: Governu no USAID halo diskusaun lista PPP iha setór turizmu

Iha aprezentasaun ne’e, setór privadu no reprezentante igreja sira entuziasmu tebes hodi dezenvolvimentu projetu ba sítiu Cristo Rei.

Kona-ba orsamentu ne’ebé atu halo projetu sítiu Cristo Rei, fatin ne’e pertense ba Governu nian maibé setór privadu mak sei prepara orsamentu, maibé haree investimentu ne’e bele to’o milliaun $3,1 to’o milliaun $4,2.

“Governu sei haree valór orsamentu ne’e bainhira setór privadu aprezenta ona dokumentu,” nia akresenta.

USAID rasik apoiu orsamentu ba Goveru Timor-Leste halo estudu viabilidade ba projetu turizmu iha Timor-Leste inklui mós Cristo Rei hamutuk besik milliaun $15.

“Ba Cristo Rei rasik estudu viabilidade ne’e hala’o ona iha tinan 2021, atu halo reabilitasaun no dezenvolve sítiu turístiku ne’e,” nia tenik.

Biban ne’e, Prezidente Asosiasaun Turizmu Relijiozu Timor-Leste (ATR-TL), Ângelo Salsinha, konsidera, inisiativa Governu no USAID serbisu hamutuk atu halo dezenvolvimentu ba sítiu istóriku ne’e di’ak tebes, maibé parte igreja husu nafatin katak bainhira konstrusaun la’o tenke nafatin respeita mós ba fatin sagradu sira ne’ebé iha.

“Ha’u husu ba Governu ho ita-nia parseiru no setór privadu sira, halo investimentu iha ne’ebé tenke kuidadu no respeita nafatin ho ita-nia fatin sagradu sira ne’ebé igreja tau ona,” nia hameno.

Jornalista    : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!