iklan

EKONOMIA, HEADLINE

MTKI fahe ona Cesta Bázika faze daruak ba benefisiáriu 36.264

MTKI fahe ona Cesta Bázika faze daruak ba benefisiáriu 36.264

Ministru Turizmu Komérsiu no Indústria José Lucas do Carmo da Silva, halo distribuisaun Cesta Bázika ba benefisiáriu sira iha aldeia Baia Leste, sesta (17/06). Imajen/MTKI

DILI, 27 jullu 2022 (TATOLI)–Ministériu Turizmu, Komérsiu no Indústria (MTKI) distribui ona Cesta Bázika faze daruak ba benefisiáriu hamutuk 36.264, iha suku haat iha munisípiu haat.

“Suku haat ne’ebé hetan ona Cesta Bázika mak hanesan suku Poetete iha munisípiu Ermera, suku Ritabou iha munisípiu Maliana no suku Dato iha munisípiu Liquiçá,” refere nota ne’ebé Agência Tatoli asesu, kuarta ne’e.

Progresu distribuisaun produtu antes ne’e, lansa hosi Ministru Turizmu Komérsiu no Indústria José Lucas do Carmo da Silva, iha aldeia Baia-Leste, suku Comoro, postu administrativu Don Aleixo, munisípiu Dili, iha loron 17 juñu 2022.

Notísia relevante: Governu lansa distribuisaun Cesta Bázika faze daruak iha aldeia Baia Leste

Tuir dadus populasaun sira ne’ebé mak benefisia ona Cesta Bázika hanesan Comoro iha aldeia Baia Leste, Fomento I-II-III, Naroman no Golgota hamutuk benefisiáriu 14.665 hosi uma-kain 3.032 mak simu ona.

Suku Poetete, munisípiu Ermera, iha aldeia 12 totál benefisiáriu 11.768 hosi uma-kain 2.290, suku Ritabou, munisípiu Bobonaro benefisiáriu 3.352 hosi uma-kain 680 mak simu ona, no suku Dato munisípiu Liquiçá benefisiáriu hamutuk 6.479 hosi uma kain 1.482 maka simu ona Cesta Bázika.

Hosi suku haat ne’e, suku Poetete distribui hosi empreza Betuhei, suku Ritabou hosi empreza Bobolait, suku Comoro aldeia Baia-Leste, Fomento I to’o III no, aldeia Naroman no Golgota distribui hosi empreza Leader Lda, no suku Dato distribui hosi empreza Hanaroman Brilliant Lda.

Durante distribuisaun, Sekretariadu Tékniku Cesta BásiKa MTKI ho kolaborasaun hosi instituisaun Estadu hodi halo monitorizasaun ba prosesu distribuisaun maka hanesan Komisaun Antí-Korrupsaun (CAC, sigla portugés), Provedoria Direitu Umanu no Justisa (PDHJ, sigla portugés), Autoridade Inspesaun no Fiskalizasaun Atividade Ekónomia Sanitaria no Alimentár, Institutu Públiku (AIFAESA, I.P), no ekipa monotorizasaun no avaliasaun hosi MTKI.

Instituisaun relevante sira ne’ebé hala’o avaliasaun no monitorizasaun iha terrenu deskobre katak, presiza hadi’a nafatin iha prosesu distribuisaun, nune’e Sekretariadu Cesta Básica no instituisaun monitorizasaun no prevensaun sira fó hanoin ba malu oinsá hadi’a regulamentu no regra produtu antes distribui ba komunidade sira tuir direitu ne’ebé mak regula ona.

Implementasaun programa Cesta Bázika faze daruak, bazeia ba Dekretu lei nú. 10/2022 04 marsu, MTKI, no Sekretaria Estadu Koperativa (SEKoop) mak nu’udar instituisaun implementadór programa Cesta Bázika ne’e ho kordenasaun hosi Ministru Koordenasaun Asuntu Ekonómiku (MKAE).

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!