iklan

EDUKASAUN, HEADLINE

Orsamentu INFORDEPE hetan redusaun ba millaun $1,8

Orsamentu INFORDEPE hetan redusaun ba millaun $1,8

Osan dolar Amérika. Imajen/Espesiál

DILI, 27 jullu 2022 (TATOLI)–Prezidente Institutu Nasional de FormaÇão de Docentes e Profissionais da Educação de Timor-Leste (INFORDEPE), Manuel Gomes de Araujo, hateten, orsamentu tetu fiskál ba instituisaun hetan redusaun ba $1.871.120.

“Konforme ami-nia proposta ne’ebé aprezenta, ami husu orsamentu lubuk boot ida maibé rezultadu mai ami maka seidauk atinje buat ne’ebé ami presiza, ne’ebé sei haree took tetu orsamentu mai ne’e atu haree oinsá bele diskute hodi hadi’a,” Prezidente INFORDEPE informa iha ninia knaar fatin, kuarta ne’e.

Proposta orsamentu inisiál instituisaun ne’e aprezenta ba Ministériu Finansa hamutuk millaun $3.952.225, maibé iha tetu orsamentu ne’e hetan redusaun ba millaun $1.871,120.

“Se hanesan ne’e oinsá INFORDEPE atu realiza ninia atividade sira iha futuru kuandu falta orsamentu,” nia akresenta.

Notísia relevante: INFORDEPE hahú limita idade profesór atu kontinua estudu baxarelatu

Tuir nia, INFORDEPE trasa ona programa ba tinan 2023 ne’ebé kontinua ho programa rua hanesan formasaun kontinuasaun no formasaun akadémika, maibé programa rua ne’e atu hetan ninia rezultadu di’ak presiza mós tau prioridade ba peskiza, dezenvolvimentu monitorizasaun no avaliasaun.

Hosi programa sira ne’e presiza apoiu orsamentu ne’ebé adekuadu atu aselera planu no programa.

“Kuandu orsamentu sira ne’ebé aprezenta hetan redusaun konserteza sei difikulta mós implementasaun programa sira iha futuru. Ita iha gabinete rua hanesan gabinete Prezidente rasik ne’ebé presiza orsamentu atu haree kona-ba saláriu vensimentu, akizisaun materiál no mós formasaun akadémika. Tanba ne’e maka ita presiza atu haree didi’ak fali tetu orsamentu hirak ne’e,” nia akresenta.

INFORDEPE hetan apoiu orsamentu hamutuk $963.188 iha tinan 2022, ne’ebé ezekuta ba sub-programa ualu, kompostu hosi despeza operasionál, manutensaun edifísiu, materiál no fornesimentu operasionál, materiál fornesimentu eskritóriu, servisu operasionál, viajen lokál, formasaun profisionál no semináriu inklui transferénsia konsensaun públika.

Jornalista   : Tomé Amado   

Editora        : Julia Chatarina 

iklan
iklan

Leave a Reply

iklan
error: Content is protected !!