OÉ-CUSSE, 27 jullu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hato’o parabéns loron aniversáriu ba Agência Notisioza Timor-Leste, Institutu Públiku (ANTIL-Tatoli, IP), no promete sei komunika Governu sentrál atu reforsa ezisténsia Tatoli iha rejiaun ne’e.
“Primeiru ha’u hakarak hato’o parabéns ba Agência Tatoli, IP, nia loron aniversáriu, no ha’u agradese mós ba Agência Tatoli, tanba finalmente tinan ida ona, Tatoli nia prezensa iha RAEOA di’ak tebes no importante ba povu Oé-Cusse, liuliu divulga informasaun kona-ba prosesu dezenvolvimentu ne’ebé la’o iha Oé-Cusse,” Arsénio Bano, ko’alia iha nia rezidénsia Oébau Oé-Cusse.
Nia informa, bainhira Tatoli to’o Oé-Cusse, haree notísia barak komesa públika sai ho balansu, ida-ne’e di’ak tebes.
“Ha’u só bele atu dehan, kontinua nafatin halo publikasaun ba informasaun, fasilita nafatin informasaun ba ita-nia populasaun ba RAEOA ne’ebé maka benefísiu tebes ba prezensa Tatoli, entaun aumenta nafatin hanesan Agência ofisiál Estadu Timor-Leste nian,” nia fó hanoin.
Nu’udar autoridade másimu iha RAEOA, prontu apoia no fasilita inklui hatán ba publikasaun sira-ne’ebé mak Tatoli fornese ona.
“Ha’u só haree de’it Oé-Cusse nian ativu tebes, ba notísia ne’ebé maka Tatoli publika, tanba kobre hotu diresaun sira hotu kada setór, ida-ne’e ami orgullu no parabéns ba loron moris Agência Tatoli,” nia orgullu.
Prezidente Autoridade RAEOA ne’e sei komunika ho Governu Sentrál liuhosi Ministériu ba Asuntu Parlamentár no Komunikasaun Sosiál (MAPkomS) atu fornese apoia ba prezensa Tatoli iha Oé-Cusse.
“Ba ha’u kuandu Oé-Cusse ninian ne’e, ha’u sujestaun ba Tatoli, autoridade sei ajuda atu fasilita ho identifika fatin, nune’e Tatoli mós iha fatin ida ba-nia, bele hala’o serbisu, no ha’u sei ko’alia ho Governu Sentrál liuliu MAPKOMS, saida maka autoridade ho MAPKOMS serbisu hamutuk, atu reforsa prezensa Tatoli nian iha Oé-Cusse, entaun ne’e ba interese públiku ba Oé-Cusse no Timor-Leste atu hetan mós novidade informasaun hosi RAEOA,” nia promete.
Notisia relevante: PPN enkoraja Agência TATOLI kombate “HOAX” liuhosi fó informasaun ho loloos
Jornalista : Abílio Elo Nini
Editór : Evaristo Soares Martins
