PD louva servisu Agência TATOLI servi públiku liuhosi informasaun

DILI, 26 jullu 2022 (TATOLI)—Deputadu Bankada Partidu Demokrátiku (PD) iha Parlamentu Nasionál, Mariano Assanami Sabino, louva servisu mídia estatál Agência TATOLI durante nia ezisténsia tinan neen (6) hodi servi públiku liuhosi informasaun.
Notísia Relevante: Bankada PLP husu Agência TATOLI tenke sai mídia krítiku-independente
“Parabéns ba Tatoli, jornalista, estrutura admistrasaun hotu, dala ida tán ha’u-nia hakoak boot no parabens. Ha’u louva imi-nia servisu durante ne’e,” Deputadu Assanami hateten ba Agência Tatoli iha Parlamentu Nasionál relasiona ho aniversáriu Agência TATOLI ba dala-VI ne’ebé selebra iha loron 27 jullu tinan ne’e.
Tuir nia, mídia ne’e klamar ba demokrásia tanba ne’e PD sempre apoiu servisu TATOLI nian.
“PD sempre apoia imi-nia servisu, imi-nia misaun sagradu hatutan funu na’in sira-nian oinsá direitu povu maubere nian ba informasaun partisipa tuir dezenvolvimentu,” nia hateten.
Nune’e, Atuál Prezidente Partidu Demokrátiku ne’e louva servisu TATOLI nian, durante ne’e servisu halo ho makaas tebes, ho ida-ne’e ba oin atu kontinua nafatin bele liberta povu liuhosi imi-nia servisu atu dignifika povu.
Tuir nia, durante observa TATOLI ninia publikasaun notísia sira iha mídia internasionál balun foti ona notísia hosi TATOLI nian, ida-ne’e hatudu TATOLI la’ós de’it hanesan Agência atu fó sai informasaun maibé sai ona Agência transforma informasaun no sai referénsia ba mídia seluk.
“TATOLI úniku fó informasaun ba ema barak. Mídia balun hosi internasionál no lokál balun sita fali Tatoli nia notísia entaun TATOLI tenke sai Agência ne’ebé mak la’ós de’it hosi nia para informa maibé nia mós hanesan Agência transforma informasaun ba mídia seluk, tanba ne’e mak nia ne’e krusiál no seriu servisu vontade di’ak,” nia dehan.
Tan ne’e, nia afirma, PD sempre apoia sai parseria ho TATOLI iha Parlamentu Nasionál no mós hanesan Partidu Demokrátiku sempre apresia apoiu tomak, tanba mídia sai elementu ida importante iha prosesu kontrusaun Estadu liu-liu atu realiza kultura demokrátiku ne’e sai kultura moris no kultura ukun nian iha rai ida-ne’e.
Nune’e, nia enkoraja jornalista TATOLI presiza kapasita-an ba beibeik hodi estuda labele baruk no kolen hodi hasa’e nafatin profisionalizmu.
“Ita moris sempre apriende estuda nafatin labele kolen no hasa’e nafatin profisionalizmu. Jornalista hotu-hotu tenke hakerek ho didi’ak, hasa’e kapasidade no uza ita-nia termu tetun ne’e ho didi’ak,” nia apela.
Jornalista : Nelson de Sousa
Editór : Cancio Ximenes

