HEADLINE, KAPITÁL, NASIONÁL

ANC fahe esperiénsia ba estudante feto iha área ICT

ANC fahe esperiénsia ba estudante feto iha área ICT

Estudante feto sira partisipa iha semináriu nasionál Girls in ICT Timor-Leste, iha Suai Room, Timor Plaza, kinta (28/07). Imajen Tatoli/António Daciparu

DILI, 28 jullu 2022 (TATOLI)—Autoridade Nasionál Komunikasaun (ANC, sigla portugés), kinta ne’e, realiza semináriu nasionál kona-ba Girls in Informations and Communication Technology (ICT) Timor-Leste, ba estudante hosi sekundária no universidade.

Prezidente ANC, João Olívio Freitas, hateten, objetivu prinsipál atividade ne’e atu konvida feto klosan sira hodi fahe matenek no esperénsia iha área ICT hodi loke liután koñesimentu espesífiku sira.

“Liuhosi esperiénsia ne’ebé ita fahe, bele dudu estudante sira-nia planu ba futuru oinsá sira bele envole-an iha kareira ICT nian,” Prezidente ANC hateten iha Suai Room, Timor Plaza.

Notísia relevante: ANC ho SEII realiza semináriu abordajen jéneru

Aleinde ne’e, inisiativa realiza semináriu ne’e tanba haree ba partisipasaun feto iha karreira profisionál ICT ne’e globalmente menus hosi 40%.

“Haree ba pursentu ne’e menus, maka esforsu ne’ebé ita halo mak presiza hasa’e persentajen liuhosi eventu semináriu ba feto sira nune’e bele hasa’e koñesimentu feto,” nia akresenta.

Iha fatin hanesan, Koordenadora ba semináriu Girls in ICT Timor-Leste, Georgina Garcia, hateten, semináriu ne’ebé realiza foin ba dahuluk iha Timor-Leste, ho objetivu hakarak enkoraja feto klosan sira ne’ebé daudaun eskola iha sekundária sira, atu bainhira ramata bele foti área estudu Siénsia Teknolojia Enjiñaria no Matemátika,” nia dehan.

Aleinde ne’e, ANC konvida partisipante hamutuk 75 hosi eskola sekundária privada no públiku sira iha Dili laran tomak ba eventu ne’e.

“Feto nia partisipasaun iha ICT Timor-Leste rasik mínimu tebes, bele dehan foin 10%, nune’e ita espera liuhosi semináriu sira ne’e bele hasa’e númeru partisipasaun feto iha ICT tanba ita-nia rai ne’e maioria mane mak barak iha área ne’e,” nia tenik.

Koordenadora ne’e konsidera partisipasaun feto ba estadu importante tebes tanba agora tama ona ba tekonolojia dijitaliazaun ne’ebé buat hotu dijitál, tanba ne’e hakarak feto sira mós bele hola parte iha prosesu tomak.

Diretora Feto Enjeñaria iha Timor-Leste, Dulce Ximenes Soares, konsidera importante tebes ba feto bele hola parte iha área ICT.

“Semináriu ne’e di’ak tebes tanba bele halibur feto ICT sira bele mai apreende no mós ba sira ne’ebé mak estuda ona iha universidade bele apreende hamutuk hodi hasa’e númeru partisipasaun feto iha ICT iha ita-nia rai tanba feto sempre iha hanoin luan,” nia tenik.

Nune’e mós, partisipante estudante hosi Universidade Nasionál Timor-Lorosa’e (UNTL), Ludyvica Anaminda, hateten, haree ba númeru partisipasaun feto menus, tanba ne’e presiza halo sosializasaun ba estudante sekundária sira nune’e sira bele iha esperénsia.

“Teknolojia ne’e importante tebes tanba sai fatór ida bele determina dezenvolvimentu hotu,” nia dehan.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!