HEADLINE, KAPITÁL, NASIONÁL

ANC halo ona notifikasaun ba operadór Timor Telecom relasiona internet lentu

ANC halo ona notifikasaun ba operadór Timor Telecom relasiona internet lentu

Prezidente ANC, Joao Olivio Freitas. Imajen Tatoli/António Daciparu

DILI, 28 jullu 2022 (TATOLI)–Autoridade Nasionál Komunikasaun (ANC, sigla portugés) halo ona notifikasaun ba operadór telekomunikasaun Timor Telecom relasiona ho  preokupasaun kliente ba rede internet lentu.

Prezidente ANC, João Olívio, hateten, karta notifikasaun ne’ebé ANC halo ne’e hafoin rona konsumidór sira ko’alia no tau iha rede sosiál.

“Ita haruka ona karta notifikasaun ba operadór Timor Telecom iha tersa (27/07), tanba esperiénsia degradasaun servisu privizasaun internet hosi kliente Timor Telecom, ne’ebé hotu-hotu hato’o reklamasaun kona-ba fornesimentu internet ne’ebé ladi’ak ka lentu,” Prezidente ANC, João Olívio Freitas, hateten, iha Suai Room, Timor Plaza, kinta ne’e.

Notísia relevante: Governu komprometidu selu dívida Timor Telecom millaun $5

Nia dehan, karta notifikasaun ne’ebé ANC halo ba operadór telekomunikasaun ne’e iha pedidu informasaun hanesan relatóriu detalladu kona-ba perturbasaun servisu internet iha loron ne’ebé akontese tanba autoridade presiza tebes relatóriu ne’e.

“Husu justifikasaun hosi Timor Telecom hanesan operadór ne’ebé regula hosi ANC, tanba sá mak laiha informasaun ruma ba ANC bainhira akontese fallansu ruma iha fornesimentu servisu telekomunikasaun ba públiku,” nia akresenta.

Aleinde ne’e, ANC husu mós Timor Telecom atu submete asaun saida mak sira halo ona ligadu ho perturbasaun ne’e rasik no planu kompensasaun ba konsumidór bainhira fallansu ne’e akontese.

“Agora ita-nia pozisaun mak hein resposta hosi operadór, ne’ebé bazeia ba sira-nia resposta mak ANC hakat fali ba prosesu tuir mai no bele mós to’o prosesu administrativu tuir lei haruka,” nia tenik.

Iha karta notifikasaun ne’e, ANC fó tempu loron 14 atu operadór telekomunikasaun ne’e fó resposta.

“Relasiona ho utilizasaun internet, ha’u husu ba konsumidór sira hotu bainhira hasoru difikuldade internet, iha direitu halo reklamasaun no aprezenta ho prova hodi bele lori direitamente ba edifísiu operadór telekomunikasaun,” nia apela.

Nune’e mós, operadór telekomunikasaun sira iha dever durante loron 15 tenke rezolve, maibé durante loron ne’e mak la fó solusaun, maka kliente sira bele hato’o iha ANC atu la’o tuir prosedimentu legál.

Relasiona ho internet lentu iha loron ikus ne’e, Agência Tatoli seidauk hetan konfirmasaun hosi parte Timor Telecom.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!