MJ deteta kompañia nasionál-Internasionál 10 arrenda tutan rai Estadu
DILI, 28 jullu 2022 (TATOLI)— Ministériu Justisa (MJ) liuhosi Gabinete Inspensaun Auditória (GIA) deteta kompañia nasionál no Internasionál hamutuk 10 mak faan no arrenda tutan rai Estadu ba empreza seluk sein koinesimentu hosi Ministériu Justisa.
Ministru Justisa, Tiago Amaral Sarmento, hateten iha levatamentu hosi GIA deteta kompañia nasionál no internasionál 20-resin mak durante ne’e selu arrendamanentu ba Estadu.
Notísia relevante: MJ sei obriga kompañia-sira selu arrendamentu rai no uma Estadu
“Ita deteta mós kompañia nasionál no internasionál hamutuk 10 mak iha hela kontratu arrendamentu ho Estadu, maibé faan fali ka arrenda tutan fali rai Estadu ba ema seluk sein koiñesimentu hosi Ministériu Justisa. Ne’e konsumu ona krime, nune’e Ministru Justisa liuhosi Gabinete Inspesaun Auditória (GIA) sei halo partisipasaun ba Ministériu Públiku hodi prosesa tuir lei,” Governante ne’e hateten ba jornalista-sira iha auditória Ministériu Justisa Colmera, kinta ne’e.
Tanba, iha kontratu arrendamentu hateten katak ema se de’it mak selebra arrendamentu rai no uma Estadu ho Ministériu Justisa ka liuhosi Terra no Propriadade, bazeia ba lei númeru 1/2003, kona-bá bens no movél laiha kompeténsia no direitu atu arreda tutan ba ema seluk.
“Bainhira ema fó aluga tutan ba ema seluk sein koñesimentu hosi Ministru Justisa ida ne’e kategoria krime fraude fiskál krime tanba la selu taxa ba Estadu tuir lei tributaria no bele prosesa administrativamentu liuhosi dalan legál,” nia esplika.
Biban ne’e, Ministru Justisa (MJ) mós Tiago orienta ba ekipa Gabinete Inspesaun Auditória (GIA) atu halo averiguasaun ba rai Estadu sira iha munisípiu Covalima.
“Ministru Justisa sei haruka ekipa ida atu ba halo averiguasaun, la’ós Covalima de’it, maibé iha munispiu hotu. Tanba emprinsípiu rai hotu estadu nian nune’e estadu mak tenke jere,” Governante ne’e orienta.
Governante ne’e hateten sidadaun hotu-hotu bele iha rai enkuantu hala’o atividade kuda plantasaun no sira seluk, maibé emprinsípiu rai ne’e estadu nian.
Notísia relevante: MJ sei kriminaliza empreza ne’ebé la selu arrendamentu ba Estadu
Jornalista: Natalino Costa
Editór : Florencio Miranda Ximenes
