HEADLINE, JUSTISA

MJ sei kriminaliza empreza ne’ebé la selu arrendamentu ba Estadu

MJ sei kriminaliza empreza ne’ebé la selu arrendamentu ba Estadu

Ministru Justisa, Tiago Amarál Sarmento. Imajen Tatoli/Francisco Sony

DILI, 11 juñu 2022 (TATOLI)—Ministru Justisa, Tiago Amaral Sarmento, hatete bazeia ba relatóriu levantamentu dadus hosi parte Gabinete Inspesaun Auditória (GIA), hatudu iha kompañia nasionál no internasionál hamutuk 20-resin mak iha kontratu arrendamentu, maibe la selu arrendamentu ba Estadu.       

Ekipa GIA halo levantamentu ba rai no uma Estadu ne’ebé empreza internasionál no nasionál sira aluga iha fulan maiu. 

“Iha loron 30 juñu, ha’u simu ona relatóriu levantamentu dadus ne’ebé hatudu katak kompañia kuaze 20- resin mak la selu arrendamentu ba Estadu, maibé iha kontratu arrendamentu,” Ministru Justisa hateten ba jornalista sira iha nia kna’ar fatin Kolmera, segunda ne’e.

Iha levantamentu dadus ne’e, Governante ne’e dehan ekipa GIA mós identifika kompañia nasionál no internasionál balun iha kontratu arrendamentu rai no uma Estadu, maibé fó aluga tutan fali ba parte seluk no laiha koñesimentu no autorizasaun hosi Ministériu Justisa.

Nune’e, Ministru Tiago kompromete iha tempu badak sei konvida parte hotu, Servisu Migrasaun (SM) liuliu Ministériu Interiór (MI) nian, Servisu Rejistu Verifikasaun Emprezariál (SERVE), Autoridade Aduaneiru (AA/ Afándega) sei hamutuk hodi haree kestaun ne’e atu fó medida ba empreza ne’ebé la tuir kontratu arrendamentu.

“Ita sei fahe serbisu, liuliu Ministériu Justisa sei haree rai no uma Estadu katak sira iha autorizasaun ka la’e, hosi parte SERVE sei haree fila fali autorizasaun no lisensa atividade  ekonómiku sira ne’e, parte Servisu Migrasaun nian sei haree ema estranjeiru sira ne’ebé serbisu iha kompañia ne’e,” nia akresenta.

Ministru Justisa hahú orienta Diresaun Terra no Propriadade hodi lori lista empreza sira ne’ebé la selu arrendamentu no aluga tutan fali ba ema selu ba Ministériu Públiku tanba komete krime kontra lei tributária nia no tenke selu 10% tuir lei tributária.

“Ami sei submete ba Ministériu Públiku hodi kontinua julga iha Tribunál tanba la’ós kestaun administrasaun, maibé ne’e kestaun krime,” nia afirma.

Iha fulan tolu ikus ne’e, nia dehan kompañia nasionál no internasionál balun hahú selu arrendamentu ba Estadu.

“Ita nia ekipa sira foin book-an uituan arredatáriu sira selu arrendamantu ba Estadu. Durante ha’u nia mandatu fulan tolu nia laran ita kosege kontribui ba kofre Estadu hamutuk millaun $2.1 no ami fiar reseita ne’e sei aumenta tan,” Ministru Justisa ne’e kompromete.

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!