EKONOMIA, HEADLINE

Pertamina internasionál garante stock kombustível sufisiente ba Timor-Leste

Pertamina internasionál garante stock kombustível sufisiente ba Timor-Leste

Ilustrasaun kombustível. Imajen/Espesiál

DILI, 28 jullu 2022 (TATOLI)-Diretór Operasionál Pertamina internasionál Timor S.A, Taruna Ariwibowo, hateten, Pertamina internasionál kontinua fornese kombustível ba Timor-Leste.

“Hakarak dehan daudaun ne’e Pertamina sei iha stock kombustível sufisiente ba Timor-Leste durante fulan-ida nia laran, nune’e husu ba públiku atu labele pániku ho informasaun falsa sira ne’ebé espalla iha públiku katak Timor-Leste enfrenta krize kombustível,” Taruna Ariwibowo, hateten ba Agência Tatoli, iha edifísiu sentrál Partamina internasionál, Bebonuk, kinta ne’e.

Iha sorin seluk, Prezidente Autoridade Nasionál Petróleu no Minerál (ANPM), Florentino Mateus Soares Ferreira, hamutuk ho Prezidente Komisaun C Parlamentu Nasionál ne’ebé trata asuntu Finansa Públika, Deputada Maria Angélica Rangel, ho ekipa halo kedas observasaun ba Pertamina internasionál iha Bebonuk, hodi haree prosesu deskaregamentu kombustível ne’ebé tama ona mai Timor iha kuarta (27/07).

Notísia relevante: PM Taur husu labele pániku, mina litru millaun haat to’o ona TL

Prezidente ANPM relata, kazu ne’e akontese tanba empreza sira ne’ebé hetan kontratu ho Governu hodi forñese voucher liga ho subsídiu kombustível ba transporte públiku sira maka enfrenta problema stock kombustível menus.

“Bainhira ami rona boatu iha públiku, ami deside tun kedas mai iha ne’e (Pertamina internasionál) hodi halo verifikasaun. Atu dehan stock kombustível normál hela tanba ró hosi Pertamina nian foin atraka hodi deskarega tan kombustível tantu gazolina, ne’ebé buatu ne’ebé espalla iha púliku katak mina laiha ne’e la’ós tanba Pertamina garante mai ami katak stock mina sufisiente no sira mós durante ne’e oferese ba abatesimentu mina sira,” nia klarifika.

Nune’e, Autoridade tenta atu buka hatene motivu loloos hosi problema ne’e.

“Motivu provizóriu ne’ebé ami indentifika maka iha distribuisaun voucer subsídiu kombustível ne’ebé interrompe tiha distribuisaun. Tanba distribuisaun voucher subsídiu nian iha parte balun fó ba iha postu abastesementu balun ikus mai postu abastesementu kombustível ne’e hetan ateke operadór transporte públiku, entaun sira ba sira uza hotu voucher entaun utiliza maka’as loos ona, laiha mekanizmu ida di’ak nune’e afeta ba distribuisaun ne’ebé ema ba iha postu abastesimentu refere sira deskobre katak mina laiha postu abastesimentu ne’e, maibé la signifika katak, ita-nia rezerva ba iha konsumu doméstika ne’e maka problema,”nia esplika.

Tanba ne’e, ANPM sei halo diskusaun ho Ministériu Transporte no Komunikasaun (MTK) hodi haree didi’ak mekanizmu saida mak presiza implementa atu nune’e ema labele hala’o hotu ba postu abastesimentu kombustível ida ka rua no oinsá kuidadu distribui voucher sira.

Prezidente Komisaun C, Maria Angelica Rangel, dehan, ni parte simu ona kontaktu barak hosi publiku kona-ba stock kombustível menus daudaun iha rai-laran.

“Hafoin simu telefone hosi públiku, ami deside tun direta mai terrenu hodi haree direta, realidade pertamina ne’ebé hatama mina mai garante mai ami katak mina stock sufisiente,” Deputadu Bankada PLP tenik.

Reprezentante povu ne’e subliña, hafoin haree tiha situasaun iha Pertamina internasionál sira mós sei ba direta postu abastesimentu kombustível sira iha Dili laran hodi verifika presu kombustível.

Jornalista   : Antonia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!