PM-PR atualiza akordu ne’ebé TL-Indonézia asina durante vizita Estadu

DILI, 28 jullu 2022 (TATOLI)—Primeiru-Ministru (PM), Taur Matan Ruak, hateten enkontu ho Prezidente Repúblika, José Ramos Horta, ko’alia kona-ba oinsá atualiza akordu sira-ne’ebé asina durante xefe Estadu hala’o vizita iha Indonézia nia kontuinuasaun.

Notísia Relevante: PR Horta: vizita Estadu kontinua hametin relasaun bilaterál TL-Indonézia

“Ohin enkontru ko’alia uitoan mós vizita Prezidente Repúblika nian ba iha Indonézia no oinsá mak aban-bainrua follow up (atualiza) ba asuntu sira-ne’ebé trata iha ne’eba bele mós iha kontinuasaun,’’ PM Taur hateten ba jornalista sira hafoin ramata enkontru semenál ho Xefe Estadu iha Palásiu Prezidensiál, Bairru Pite, kinta ne’e.

Tan ne’e, Prezidente Repúblika (PR) orienta ona ninia gabinete prepara hela relatóriu vizita hodi bele partilla ho Governu.

“Prezidente husu gabinete prepara hela relatóriu haruka partilla ba Governu oinsá mak bele halo follow up asuntu no akordu sira-ne’ebé trata no asina iha Indonézia hodi haree pasu ba oin halo nusa,” Taur hateten.

Xefe Governu ne’e dehan, bainhira Timor-Leste asina ona akordu sira hanesan pasu administrativu, tékniku tenke la’o antes TL implementa no labele dehan asina ohin halo kedas no ohin implementa.

Entaun, daudaun ne’e Governu atentu loos se TL asina akordu ida tenke prepara planu halo oinsá mak atu implementa akordu hirak ne’e.

Eis Prezidente Repúblika ne’e dehan, uluk bainhira sei hanesan Prezidente Repúblika ne’e iha ona akordu, konvensaun, MoU barak besik 200-resin maibé 20 de’it mak implementa.

“Uluk ha’u sei Prezidente Repúblika ezije ba Ministéiru Negósiu Estranjeiru no Kooperasaun (MNEK), akordu no konvensaun, MoU hira barak mak implementasaun uitoan liu kuaze 10%. Ne’ebé, ha’u hanoin agora daudaun sei halo esforsu la’ós ita asina de’it hanesan akordu ne’ebé asina ho MCC, Ministéiru Negósiu Estranjeiru Xina no mós ho Indonézia no nasaun sira seluk. Entaun ita tenke buka balun haruka ba Parlamentu Nasionál atu ratifika maibé balun tenke halo follow up,” nia dehan.

Ne’ebé Governu iha konsiénsia saida mak tenke halo, nune’e akordu sira-ne’ebé ba asina ne’e bele iha kontinuidade ba oin.

Notísia relevante:

Durante sorumutu, Xefe Governu atualiza ba PR Horta, ligadu ho atividade Governu nian relasiona ho akordu ne’ebé Estadu iha ho Millennium Challenge Corporation (MCC) ne’ebé Konsellu Ministru (KM) aprova haruka ba Parlamentu Nasionál (PN) atu ratifika, no mós investimentu sira-ne’ebé Governu halo tantu iha Dili no munisípiu balun kona-ba oinsá hadi’a  bee-moos.

Enkuantu durante vizita  Estadu ne’e,  Prezidente Repúblika, José Ramos Horta, semana ida iha Indonézia akompaña mós membru VIII Governu Konstituisionál hanesan Ministra Negósiu Estranjeiru no Kooperasaun (MNEK), Ministru Agrikultura no Peska (MAP), Minsitru Koordenadór Asuntu Ekonómiku (MEKAE), Ministru Transporte no Telekomunikasaun (MTK), Ministru Turizmu Komérsiu no Indústria (MTKI), iha ne’ebé asina mós akordu kooperasaun iha área hanesan agrikultura, transporte terreste, padronizaun no meterolojia no área kooperasaun komérsiu nian.

Jornalista : Nelson de Sousa

Editór       : Cancio Ximenes