INKLUZAUN SOSIÁL, MUNISÍPIU, NASIONÁL

SEPS verifika dadus hodi fó apoiu rekuperasaun ba vítima inundasaun Viqueque

SEPS verifika dadus hodi fó apoiu rekuperasaun ba vítima inundasaun Viqueque

Prezidente Autoridade Protesaun Sivil, Supertendente Polísia, Ismael da Costa Babo. Imajen Tatoli/Vitorino Lopes da Costa

DILI, 28 jullu 2022 (TATOLI)—Prezidente Autoridade Protesaun Sivil, Supertendente Polísia, Ismael da Costa Babo, hateten, daudaun ekipa halo hela verifikasaun ba dadus vítima  afetadu inundasaun foin lalais iha munisípiu Viqueque.

“Ita-nia inan-aman sira  hosi munisípiu Viqueque ne’ebé afetadu inundasaun iha fulan kotuk, ami-nia ekipa sira daudaun sei halo verikasaun kategoria grau estragu, nune’e bainhira finaliza hotu, iha tempu badak ami sei apoia materiál ba rekuperasaun uma-kain afetadu sira,” Prezidente  Autoridade Protesaun Sivil informa ba Agência Tatoli, iha ninia knaar fatin, Caicoli, kinta ne’e.

Notísia relevante: Protesaun Sivil distribui pakote emerjénsia ba uma-kain 207 iha Uatucarbau

Governu liuhosi Sekretaria Estadu Protesaun Sivil (SEPS) kumpre dever tuir  lei-dekretu númeru 07/2021 kona-ba apoiu públiku konsiderasaun hosi Estadu ba vítima ba asidente grave ka katástrofe.

“Iha klasifikasaun ba kategoria, atu hetan apoiu ne’e ho tipu kategoria hanesan uma estragu totál, estragu naton no estragu kama’an. Hosi  prosesu verikasaun ba kategoria tolu ne’e,  ami sei hamutuk ho autoridade sira, hafoin ita haree  kritériu sira. Tanba ne’e ami-nia ekipa sira kontinua halo verifikasaun, espera iha tempu badak sira aprezenta mai nasionál maka ita halo prosesu rekuperasaun nian,” nia akresenta.

Subsídiu apoiu ba vítima sira ba kategoria tolu hanesan estragu totál ba rekonstrusaun uma ho montante $850 no apoia transporte $150 ho totál $1.000, estragu naton apoiu ba rekonstrusaun $600 no apoia transporte $150 ho totál $750 inklui estragu kama’an apoia rekuperasaun $450 no apoia transporte $150 ho totál $600, ne’ebé valór ne’e bazeia ba tabela apoiu rekuperasaun dezastre naturál hosi dekretu lei númeru 7/2021.

Bazeia ba dekretu-lei númeru 07/2021 hosi artigu 9 kona-ba doasaun materiál konstrusaun ba reparasaun ka rekonstrusaun no abilitasaun, bainhira Governu fó materiál ba vitima sira, husu atu labele halo tan uma iha fatin perigu ba risku dezastre naturál.

Tuir dadus, afetadu dezastre naturál ne’ebé akontese iha fulan-juñu, munisípiu Viqueque hamutuk uma-kain 859, ne’ebé bee sobu komunidade nia uma, iha postu administrativu Uatucarbau no Viqueque vila.

Hosi dadus  hirak ne’e, foin lalais Protesaun Sivíl Viqueque hamutuk ho parseiru sira fó ona apoia pakote emerjénsia ba uma-kain efadu sira iha munisípiu Viqueque.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!