VIQUEQUE, 15 jullu 2022 (TATOLI)—Protesaun Sivil Viqueque no parseiru distribui ona pakote emerjénsia ba uma-kain 207 iha postu administrativu Uatucarbau, ne’ebé afetadu dezastre naturál iha loron 29 juñu.
“Ami horiseik (kinta) distribui tan ona pakote emerjénsia ba ita-nia vítima afetadu hosi postu administrativu Uatucarbau hamutuk 207, maibé iha rekalamasaun balun,” Koordenadór Protesaun Sivil munisípiu Viqueque, Cerilo Soares Gomes, hateten ba Agência Tatoli, iha postu Viqueque vila, sesta ne’e.
Notísia relevante: Uma-kain 102 hosi suku Maluru simu ona pakote emerjénsia
Postu Uatucarbau iha suku tolu hanesan Irabin de Baixo, Uani-uma no Afaloikai mak afetadu inundasaun.
Hosi uma-kain 207, iha uma-kain 66 maka sei hetan materiál rekuperasaun, enkuantu uma-kain hamutuk 141 hetan apoia emerjénsia tanba sira-nia uma la hetan estragu maka’as.
“Prosesu distribuisaun materiál rekuperasaun sei kleur tanba ita sei haruka relatóriu ba nasionál no sei hetan aprovasaun maka foin ita distribui materiál hanesan kalen, besi, semente no osan,” nia tenik.
Aleinde ne’e, afetadu hosi postu Uatulari hamutuk uma-kain 31 maka seidauk hetan distribuisaun pakote emerjénsia ba vítima.
“Ami seidauk distribui pakote emerjénsia ba vítima sira iha postu Uatulari, tamba ami sei haree stock sasán, bainhira tama fali ona mak ami kontinua distribui ba ita-nia vítima sira,” Koordenadór Protesaun Sivil dehan.
Jornalista : Vitorino Lopes da Costa
Editora : Julia Chatarina
