DILI, 28 jullu 2022 (TATOLI)—Deputadu hosi bankada Fretilin iha Parlamentu Nasionál, Joaquim dos Santos, husu mídia estatál Agência TATOLI, Institutu Públiku (TATOLI, I.P), atu hakle’an reportajen ho karáter investigativu temátiku ba informasaun hodi bele sai kualidade liután.
Notísia Relevante: Don Virgílio: Servisu Agência TATOLI nakonu ho dedikasaun ba povu TL
Deputadu Joaquim hato’o lia hirak ne’e relasiona ho aniversáriu Agência TATOLI nia ezisténsia ba dala-VI ne’ebé selebra iha loron 27 jullu tinan ne’e.
“Ha’u akompaña durante ne’e notísia TATOLI lais liu bazea ba faktu ne’ebé entidade sira halo iha desizaun polítika sira enteremu traballu informasaun ba públiku, TATOLI hanesan Agência ida fó sai informasaun lais tebes. Maibé presiza hadi’a buat balun liu-liu iha informasaun periódiku la’ós diáriu, se bele karik bele halo notísia investigativu depois temátiku durante ne’ebé ha’u akomapaña imi halo hanesan relatóriu jenériku de’it ba faktu sira,” Deputadu Joaquim dos Santos, hateten ba Agencia TATOLI iha Parlamentu Nasionál.
Tanba ne’e, mezmu durante ne’e iha reportajen sira diáriu de’it no halo ona reportajen sira klean maibé seida’uk másimu nune’e presiza kontinua liután bele sai Agência ida kualidade liután iha informasaun sira-ne’ebé fó sai.
“Se di’ak liután ba públiku nia kuñesimentu de’it maibé ba ema sira-ne’ebé halo peskiza karik bele uza imi fonte informasaun hanesan mateira investigasaun. Ezemplu, imi halo notísia ne’ebé ho métodu investigativu faktu auténtiku ita respeita bele mós ho rasosinu jornalista nian bele fó efeitu ba mudansa komportamentu sosiál. Se ida-ne’e mak imi halo tan, maizamenus ita bele hetan Agência ida-ne’ebé nia kualidade liutan,” nia sujere.
Tanba, faktuál ka akontesimentu de’it maibé laiha efeitu investigativu, nune’e se ida-ne’e mak Tatoli halo kapaas loos no kualidade liután.
Maibé, Deputadu hosi bankada Governu ne’e, hateten ida ne’e presiza prepara kondisaun ba jornalista sira profisonal bele halo servisu investigativu.
Mezmu ne’e, deputadu ne’e apresia servisu sira TATOLI presta durante ne’e pozetivu tebes no oinsá kontinua ba oin hadi’a liután servisu sira hodi servi nasaun no povu liuhosi informasaun.
Deputadu hosi bankada Fretilin hato’o parabens ba Agência TATOLI ne’ebé komemora ninia aniversáriu ba dala-VI.
“Hato’o parabéns ba Agência TATOLI ne’ebé halo tinan neen no dezeju susesu iha servisu atu bele kontribui ba pás, estabilidade nasionál no importante mak servisu hamutuk ho entidade sira ne’ebé Estadu nian ne’ebé bele garante estabilidade polítika iha informasaun ba sidadaun sira,” nia hateten.
Nia dehan, jornalista sira la’ós hatudu de’it profisionalizmu maibé tenke hala’o kna’ar hanesan ema-ne’ebé iha kapasidade atu bele hato’o informasaun ba públiku ho informasaun ne’ebé loos, informasaun ne’ebé ekilibradu, regra komunikasaun sosiál bele orienta jornalista sira TATOLI bele sai jornalista profisionál liután.
Jornalista : Nelson de Sousa
Editór : Cancio Ximenes
