DILI, 27 jullu 2022 (TATOLI)—Arsebispu Arkidiozese Metropolitania Dili, Don Vírgilio do Carmo da Silva, hateten servisu sira-ne’ebé Agência TATOLI halo durante ne’e nakonu ho dedikasaun ba povu Timor-Leste.
Notísia Relevante: PM Taur husu Agência Tatoli, I.P kontinua servisu di’ak
“Ha’u-nia proximidade ho TATOLI di’akliu iha tempu COVID-19 nia laran, ne’ebé ha’u bele kuiñese di’akliu imi. Ne’ebé mai to’o momentu ida-ne’e ha’u haree katak servisu lubun ida ne’ebé imi halo ho profisional. Servisu sira-ne’ebé Agência TATOLI halo durante ne’e nakonu ho dedikasaun ba povu Timor-Leste,” Don Virgílio hato’o nia mensajen ba Agência Tatoli iha ambitu komemorasaun aniversáriu Agência TATOLI ba dala-VI iha loron 27 jullu, iha nia kna’ar fatin Kámara Episkopál, Lecidere, Dili.
Don Virgílio do Carmo hateten momentu iha selebrasaun aniversáriu ba dala-VI ne’e atu agradese ba Maromak ba buat di’ak hotu ne’ebé hetan no oinsá avalia an atu hakat liután ba oin hodi oferese servisu di’ak liután ba povu ida-ne’e.
“Momentu importante selebra imi nia aniversáriu ne’e sempre sai momentu ida ba imi atu bele. Primeiru, agradese ba Maromak ba di’ak hotu ne’ebé imi simu ona. Segundu, sai mós oportunidade ba Agência TATOLI oinsá atu avalia di’ak liután imi-nia-an atu hakat ba oin, atu bele oferese di’ak liután servisu ba povu no rai ida-ne’e, liuhosi informasaun ne’ebé imi pasa. Tanba, ohin loron ita hatene katak informasaun buat ida importante tebes liga ho ita-nia moris ohin loron ninian. Nune’e, ha’u reza ba imi hodi Maromak nafatin fó di’ak ba imi nia servisu,” Amululik ne’e hateten.
Arsebispu ne’e apresia ba publikasaun notísia sira iha portál TATOLI durante ne’e, ne’ebé hatudu profisionalizmu hodi fó sai informasaun ba públiku ne’ebé aleinde ho lian tetún ho mós lian internasionál sira seluk.
“Ha’u apresia tebe-tebes tanba maneira sira hatudu duni profisionalizmu iha maneira imi foti mensajen notísia no hakerek notísia la’ós de’it iha lian tetun maibé iha mós lian inglés, protugés bahasa Indonézia. Parabéns no dezesu susesu,” Amo Salesiano ne’e apresia.
Tan ne’e, Don Virgílio do Carmo nia mensajen ba Agência TATOLI katak buat di’ak barak hala’o ona no atu hakat ba oin di’ak liután mak presiza mós nafatin ekipa iha TATOLI halo avaliasaun hamutuk atu haree oinsá mak bele hatán ba ezijénsia ohin loron ninian, atualiza nafatin notísia sira ho meiu modernu no atrativu, profisionalismu atu mensajen sira-ne’ebé di’ak no loos hodi transmite informasaun ba públiku.
Biban ikus liu, nailulik ne’eparabeniza Agência TATOLI, Institutu Públiku (TATOLI, I.P) iha loron 27 jullu ne’e komemora nia aniversáriu ba dala-VI (27 jullu 2016-27 jullu 2022).
“Hakarak hodi ha’u-nia naran pesoál no hodi mós Arkidiosede Dili hato’o ami-nia parabéns ba Ajénsia TATOLI no servisu-na’in sira hotu hodi selebra imi-nia loron,” Don Virgílio tatoli lia-tatoli.
Notísia Relevante: PPN enkoraja Agência TATOLI kombate “HOAX” liuhosi fó informasaun ho loloos
Agência TATOLI
Agência TATOLI, Instituisaun Públiku (TATOLI, I.P) nu’udar ajénsia ofisiál Estadu Timor-Leste nian. Ezisténsia Agência TATOLI, I.P mai hosi inisiativa Sekretáriu Estadu Komunikasaun Sosiál (SEKOMS), iha 2012-2017.
Agência TATOLI, I.P nu’udar transformasaun hosi ETNA (East Timor News Agency), ne’ebé nakfila ba ANTIL (Agência Notisioza Timor-Leste). Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL.
ANTIL ne’e lansa hosi Primeiru-Ministru, Rui Maria de Araújo, iha loron 27 juñu 2016. Iha marsu 2017, Konsellu-Ministru aprova ANTIL sai TATOLI, nu’udar ajénsia ofisiál Estadu Timor-Leste nian no publika iha Jornál Repúblika. TATOLI ho nia estatutu rasik nu’udar Institutu Públiku (IP).
Objetivu primeiru estabelese ajénsia estadu Timor-Leste mak sai fonte informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál.
Segundu, nu’udar implementadór konstituisaun ne’ebé sai dever Governu nian atu fó servisu oferesimentu informasaun ne’ebé kredivel no loos nomós sai direitu informasaun sosiedade Timor-Leste ne’ebé garantidu hosi artigu 40 no 41 konstituisaun Timor-Leste nian.
Terseiru, nu’udar instituisaun komunikasaun informasaun, Agência TATOLI.IP la’ós de’it sai produtór informasaun maibé mós bele iha papel nu’udar “National information clearing house” ne’ebé iha tarefa fó klarifikasaun no informasaun serteza, halakon misinformasaun no disinformasaun. Bele sai nu’udar “área istória” no “eskritór istória” pátria, nasaun, sosiedade nomós nu’udar “maklibur no fornesedór informasaun públiku”.
Kuartu, halo Agência Notisioza TATOLI, I.P nu’udar padraun minimál kompeténsia jornalístika ba jornalista Timor-Leste ne’ebé sempre bele prodús produtu informasaun-kareira jornalístika ne’ebé iha kualidade tuir dinámika sosiál no nesesidade informasaun sosiedade nian.
“Fenómena no dinámika sosiál” ne’ebé “dinámika komunikasaun” ne’ebé estimula ho dezenvolvimentu teknolojia komunikasaun-informasaun lori konsekuénsia iha Timor-Leste ho paradigma nesesidade informasaun públiku iha ne’ebé TATOLI nu’udar ajénsia notísia nasionál Timor-Leste ne’ebé la’ós de’it ezije atu bele fornese pakote informasaun iha kontextu “mainstream” maibé iha futuru bele mós prodús informasaun alternativa ho karáter “taylor made” ne’ebé propoen hosi utilizadór informasaun determinada.
TATOLI nu’udar ajénsia notísia Timor-Leste ho karáter multikanál, multimedia, multiplataforma no multitarefa ne’ebé bele mós dezenvolvidu no iha funsaun nu’udar sentru produsaun filme no dokumentasaun nasaun, sentru opiniaun públiku nomós fórum informasaun públiku, sentru jestaun arkivu no dokumentu nasaun nomós sentru edukasaun-formasaun peskiza no dezenvolvimentu komunikasaun aplikada.
Funsaun oioin, papel, abilidade no feramenta komunikasaun institusionál ajénsia notisioza ne’e iha nia tempu bele fonte konsumu ba ajénsia notisioza ne’ebé posibilita ajénsia notísia Timor-Leste ne’e moris, krexe no dezenvolve nu’udar instituisaun komunikasaun ho karáter “income generate” (bele rezulta konsumidór) no la bebeik nu’udar “cost center” (sai pezu finanseiru).
TATOLI, I.P nu’udar ajénsia notísia nasionál Timor-Leste ne’ebé moris, krexe, ne’ebé dezenvolve ho jestaun ne’ebé profisionál, apoiadu hosi rekursu umanu ne’ebé kompetente ho apoiu saláriu minimál ne’ebé sufisiente no ho apresia kompeténsia no kapasidade nia jornalista sira halo, bele sai “modelu” no “padraun indústria komunikasaun-informasaun no prátika jornalístika” futuru ne’ebé ho kualidade-dignidade nu’udar inventáriu nasionál Timor-Leste.
Notísia Relevante: PR Horta enkoraja TATOLI kontinua públika informasaun loos ba públiku
Jornalista : Nelson de Sousa
Editór : Cancio Ximenes
