DILI, 29 jullu 2022 (TATOLI)—Ministru Finansa (MF), Rui Augusto Gomes, reprezenta Governu Timor-Leste no reprezentante Banku Mundiál iha Timor-Leste, Bernard Harborne, sesta ne’e, selebra akordu empréstimu ho montante millaun $121 hodi dezenvolve,hadi’a, no espande sistema ezistente bee-moos iha kapitál Díli parte Leste.
Bee-moos ne’e sei benefisia populasaun hamutuk 82.380, liuhosi koneksaun bee ba uma sira no monta kontadór hamutuk 12.482 iha uma sira.
“Dili enfrenta hela dezáfiu oinoin iha área sosiál no ambientál. Ezemplu, hosi ema na’in-lima, ema na’in-tolu mak laiha asesu ba bee-moos mak inan-feton no labarik barak lakon tempu ba kuru bee, situasaun ne’e obriga labarik sira labele ba eskola no lakon oportunidade ba edukasaun. Ida-ne’e akontese iha tinan barak ona,” Ministru Finansa, Rui Augusto Gomes, hateten iha ámbitu selebrasaun akordu iha Ministériu Finansa, Aitarak-laran.
Norísia relavante: Governu no Banku Mundiál sei selebra akordu finansiamentu projetu fornesimentu bee-moos
Ministru dehan, problema bee-moos iha kapitál Dili boot tebes no hetok kompleksu liután, tanba populasaun aumenta hela de’it kada tinan, lais liu fali taxa kresimentu disponibilidade servisu.
“Kuaze 1/3 hosi populasaun Timor-Leste konsentra iha Dili no ida-ne’e halo ita-nia rekursu bee hetok limitadu. Tanba ne’e, serimónia asinatura akordu empréstimu millaun $121 ne’e nu’udar esforsu ida atu responde ba problema iha kapitál Dili enfrenta hela, liuliu iha parte Leste,” nia akresenta.
Projetu sei hahú iha fulan-outubru tinan ne’e ba durasaun tinan-hitu hodi dezenvolve, hadi’a no espande sistema distribuisaun no kanalizasaun bee-moos iha kapitál Dili parte Leste ne’ebé barak mak tuan ona no laiha reparasaun.
Aleinde ne’e, investimentu estratéjiku ne’e mós buka atu hasa’e kapasidade jestaun no prestasaun servisu Bee Timor-Leste, Empreza Públiku ida ne’ebé Governu harii iha tinan-rua liubá.
Investimentu estratéjiku iha área infraestrutura inklui bee-moos, integra ona iha Planu Estratéjiku Dezenvolvimentu 2011-2030, dokumentu importante ida ne’ebé sai hanesan baze ba Programa VIII Governu Konstitusionál.
Iha Planu ne’e mós define modalidade sira ba investimentu estratéjiku liuhosi Parseria Públiku-Privada (PPP).
Kona-ba modalidade PPP, Governu kontinua halo aprosimasaun ba Ajénsia Kooperasaun Bilaterál (JICA, sigla portugés) no Banku Multilaterál (ADB no Banku Mundiál) atu hetan empréstimu ho funan kiik ho objetivu atu finansia investimentu infraestrutura ne’ebé bele fó impaktu ba kresimentu ekonómiku iha rai-laran no garante fundu minarai bele moris naruk.
“Termu empréstimu hosi International Development Association (IDA) ho montante millaun $121 ne’e baratu liu, kuaze besik 53% duke ita ba foti osan hosi ita-nia fundu minarai. Aseitasaun hosi Banku Mundiál hodi konkorda ho funan ki’ik ne’e enkaixa bem ho benefisiu sosiál no impaktu ne’ebé mak Projetu ne’e sei halo hodi redus pobreza iha área Dili parte Leste,” nia tenik.
Enkuantu, hahú hosi 2012 to 2022, empréstimu ne’ebé Governu foti ona hosi ADB, Banku Mundiál no JICA hamutuk millaun $731,5. Husi montante ne’e, Governu foin mak ezekuta millaun $257 ka 36%. To’o iha fulan kotuk, Governu selu filafali ona millaun $20,3 ho nia taxa de juru millaun $18,4. Retornu investimentu fundu minarai to’o iha iha maiu 2022 atinje 4,33% kada tinan, kompara ho kustu empréstimu baratu, 1,57% kada tinan.
Tanba ne’e, Ministru husu apoiu másimu hosi liña ministériu relevante, ajénsia implementadór no autoridade lokál sira atu hasa’e prestasaun servisu iha nível baze atu garante katak investimentu estratéjiku ne’e ezekuta tuir tempu bazeia ba termus referénsia ne’ebe prevee ona iha akordu refere, hodi ikus mai bele lori impaktu signifikativu no mudansa pozitivu ba timor-oan sira-nia moris.
“Hodi naran VII Governu Konstitusionál no mós Ministériu Finansa, ha’u hato’o apresiasaun sinseru ba Banku Mundiál, ADB no JICA ba apoiu kontínuu iha sub-setór bee-moos. Projetu ne’e konstitui uma marka visível husi parseria ida ne’ebé forte entre Governu Timor-Leste no Banku Mundiál no Governu komprometidu atu kontinua mantein kooperasaun di’ak ho Banku Mundiál ba dezenvolvimentu Timor-Leste,” Ministru Rui Gomes tenik.
Iha eventu asinatura akordu ne’e, Ministru Rui Gomes akompaña hosi Vise-Ministru Finansa, Vise-Ministru Negósiu Estranjeiru no Kooperasaun no Vise-Ministru Justisa.
Jornalista : Antónia Gusmão
Editora : Julia Chatarina
