DILI, 01 agostu 2022 (TATOLI)—Administradora Postu Administrativu Nain Feto, Munisípiu Dili, Herminia Martins, husu Autoridade Munisípiu Dili (AMD) aumenta pesoál saneamentu iha jardin Largo de Lecidere, tanba AMD rekruta pesoál limpeza na’in-20 ne’e la sufisiente.
Notisia Relevante: Jardin kapitál foer: administradór postu administrativu sira-nia responsabilidade
“Pesoál saneamentu hamoos jardin, sira (Autoridade Munisípiu Dili) rektura hosi Postu Nain Fetohamutuk 20 de’it, ida ne’e la sufisiente. Tanba, ita-nia pesoál saneamentu 20 ne’e la’ós hamoos de’it iha jardin Largo Lecidere maibé sira hamoos mós foer iha tasi ibun. Tanba ne’e, ami-nia sujestaun karik bele aumenta tan pesoál saneamentu halo limpeza iha jardin Largo Lecidere, nune’e bele hamoos foer moos liu,” Administradora ne’e hateten ba Agência Tatoli, iha nia kna’ar fatin, Díli, segunda ne’e.
Tanba, nia dehan. pesoál saneamentu iha postu administrativu Nain Feto nia servisu mak hala’o limpeza hosi jardin Largo Lecidere mai to’o edifísiu Unidade Polísia Martima (UPM) nian.
“Ida-ne’e la’os sira la servisu. Sira-nia servisu limpeza ne’e ho oras neen (6) de’it, hahú hosi oras tolu iha dadeer no oras tolu iha lorokraik. Hanesan iha dadeer sira hahú servisu hosi tuku 08h00 to’o tuku 11h00 no meudia sira ba deskansa, hafoin iha tuku 02h00 hahú fali to’o tuku 04h00 lorokraik. Ida-ne’e mak sira-nia oras servisu, karik fo’er sira hamoos la moos, ami-nia sujestaun rekruta tan ema nune’e bele aselera servisu iha terenu,” nia dehan.
Tuir administradora nia planu ba oin, hakarak halo jardin Largo Lecidere moos hosi foer, tenke aumenta tan pesoál limpeza, nune’e bele fahe servisu.
“Ha’u-nia estratéjia hakarak halo ambiente ne’e moos, presiza aumenta tan pesoál saneamentu, atu nune’e sira iha kooperasaun servisu, hanesan balun ba rega ai-funan, balun dasa rai,” nia dehan.
Nia informa, pesoál saneamentu sira-ne’ebé loro-loron hala’o servisu hodi hamoos foer iha jardin Largo Lecidere ne’e, ema ida simu salariu $115 kada fulan.
Xefe Departamentu Saneamentu Munisípiu Dili, Domingos Soriano, afirma karik pesoál limpeza iha jardin Largo Lecidere la sufisiente, administradora postu administrativu Nain Feto, munisípiu Dili, halo proposta ba Prezidente Autoridade Munisipál Dili (PAM), Guilhermina Filomena Saldanha, hodi haree.
“Tanba, ami saneamentu orienta no halo monitorizasaun de’it ba servisu iha terrenu. Tanba, ko’alia ba pesoál to’o ka la to’o, ida-ne’e ko’alia hotu ba orsamentu. Se bele administradora halo pedidu ka proposta ba PAM,” nia dehan.
Tanba, tuir Departamentu Saneamentu Munisípiu Dili nia haree, jardin Largo Lecidere ne’e autoridade postu administrativu Nain Feto tau hela pesoál limpeza iha ne’ebá, maibé la’ós permanente loro-loron.
“Hanesan ohin sira hamoos, aban no bainrua mak hamoos fali, tanba sira halo oráriu fahe ema tenke kobre ba tasi ibun no jardin sira,” nia dehan.
Jornalista : Nelia Fernandes
Editór : Cancio Ximenes
