AILEU, DILI, KAPITÁL, NASIONÁL

Jardin kapitál foer: administradór postu administrativu sira-nia responsabilidade

Jardin kapitál foer: administradór postu administrativu sira-nia responsabilidade

Ambiente Jardin 05 de Maio Colmera, Dili, tersa (27/06). Imajen Tatoli/Francisco Sony.

DILI, 29 jullu 2022 (TATOLI)—Xefe Departamentu Saneamentu Munisípiu Dili, Domingos Soriano, hateten jardin iha kapitál Dili daudaun ne’e foer no la kontrola hosi pesoál limpeza ne’e, administradór postu administrative iha munisípiu Dili nia responsabilidade.

Notísia Relevante: AMD kontrata ona pesoál limpeza 112 hamoos jardin kapitál

Tuir alokasaun Autoridade Munisípiu Dili (AMD) liuhosi Departamentu Saneamentu Munisípiu Dili katak postu administrativu Nain Feto responsavél hala’o limpeza ba jardin Largo de Lecidere, postu administrativu Cristo Rei responsavél hala’o limpeza ba jardin Cristo Rei, postu administrativu Vera Crúz responsavel hala’o limpeza ba jardin Motael no postu administrativu Don Aleixo responsavel hala’o limpeza ba jardin Nicolau Lobatu.

Xefe Departamentu Saneamentu Munisípiu Dili, Domingos Soriano. Imajen Tatoli/Osória Marques.

“Ita-nia jardin, Munisípiu Dili rekruta pesoál postu administrativu hamutuk 112 ba iha postu administrativu haat. Iha postu Don Aleixo na’in-39, postu Cristo Rei na’in-33, Vera Crúz na’in-20 no Nain Feto na’in-20. Ita rekruta pesoál postu sira liuhosi munisípiu Dili, pesoál sira-ne’e aloka ba iha postu no postu mak jere servisu iha ne’ebá. Atu jardin servisu ka la servisu ne’e iha Administradór Postu Administrativu nia responsabilidade, tanba ita aloka ona ema ba iha ne’ebá atu sira jere, hodi aloka ba jardin sira-ne’e,” Domingos Soriano informa ba Agénsia Tatoli, iha nia knaar fatin, Dili, kinta ne’e.

Nia esplika, tuir saneamentu nia haree katak iha jardin hira mak ema servisu hanesan iha postu administrativu Don Aleixo aloka ona pesoál ba iha jardin Nicolau Lobato no postu administrativu Vera Crúz, sira tau ona ema iha jardin Faról hodi halo limpeza.

“Ba postu Nain Feto, sira tau ema iha jardin Largo Lecidere no jardin Nain Feto Nossa Senhora ida-ne’e, ita-nia saneamentu mak iha ne’ebá hodi halo limpeza,” nia dehan.

Ba jardin Cristo Rei no BJ Habibie iha ema hosi postu administrativu Cristo Rei mak tau matan hela iha ne’ebá.

Tuir nia, ba parte jardin sira hosi postu administrativu Vera Crúz mak falla uitoan, tanba laiha ema ba hamoos maibé saneamentu apoiu bainhira duut naruk hodi tesi, ne’e saneamentu ba hamoos.

“Hanesan iha sesta semana kotuk saneamentu ba hamoos ona no ohin karik sira muda fali ba fatin seluk, ida-ne’e ha’u seidauk hetan informasaun,” nia informa.

Administradór Postu Administrativu Vera Crúz, Manuel Gusmão, aseita ho informasaun hosi Xefe Departamentu Saneamentu Munisípiu Dili katak administradór postu administrativu sira mak responsavél ba pesoál limpeza iha jardin kapitál Dili.

“Iha postu Vera Crúz ne’e munisípiu Dili rekruta pesoál 20 de’it, agora ho pesoál 20 ne’e ami tenke aselera prosesu hotu. Ba jardin sira, ita koloka ona pesoál na’in-rua (2) ba jardim CAC nia oin, sira-ne’e stand by iha ne’ebá. Agora na’in-haat (4), ida-ne’e ita tau iha jardin 05 maiu, inklui mós jardin kiik rua (2) iha Hotel Timor nia oin,” nia esplika.

Agora ba jardin seluk hanesan Colmera, Tiger Full nia oin, ida ne’e pesoál limpeza postu Vera Crúz halo rotativa hamoos de’it tanba pesoál la to’o no pesoál balun tenke aloka ba hamoos iha suku sira-ne’ebé foer hela.

“Ita hatene katak, Vera Crúz iha kedas suku hitu (7), suku ne’ebé urbana iha suku lima (5) la inklui Dare no Lahane. Maibé, suku lima ne’ebé iha urbana ita sempre hamoos,” nia dehan.

Entaun, ba pesoál limpeza na’in-11 ne’e, sira ba hamoos foer iha valeta sira, tanba valeta iha Vera Crúz foer barak, liu-liu iha área Caicaoli, tanba ne’e pesoál 20 ne’e labele stand by iha jardin sira.

“Maibé, iha loron sabádu no domingu ita haruka sira servisu, tanba sira tenke troka malu, hanesan balun off no balun tama, ida ne’e mak durante ita halo. Se pesoál 20 mak aloka hotu ba jardin sira, entaun foer sira iha suku ne’e oinsá, tanba ne’e mak ita koloka sira rotativa, hanesan balun ba jardin hamoos no aban seluk ba fali,” nia dehan.

Tanba ne’e, tuir administradór postu administrativu nia hanoin Autoridade Munisípiu Dili (AMD) tenke rekruta pesoál iha postu Vera Crúz barak, nune’e bele aloka ba jardin iha área Vera Crúz hodi halo limpeza.

“Ami atu esforsu ho pesoál 20 ne’e fahe oinsá, tuir loloos ba Vera Crúz sira (AMD), tenke tau barak tanba área jardin barak liu iha vera crúz,” nia dehan.

Entretantu, tuir informasaun hosi Xefe Departamentu Saneamentu Munisípiu Dili, Domingos Soriano, katak jardin iha kapitál Dili, daudaun ne’e hamutuk 13 ne’ebé kompostu hosi jardin Cristo Rei, Prezidente BJ Habibie, Largo de Lecidere, Nain Feto, Palácio Governo oin, Rotunda Francisco Xavier, jardin Motael, jardin CAC oin, jardin Bibi Bulak iha Mandarin, jardin Colmera, jardin 05 de Mmaio, jardin GMNTV oin no jardin Nicolau Lobato.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!