iklan

NASIONÁL, HEADLINE, MANUFAHI, MUNISÍPIU, POLÍTIKA

Governu sei hakoi restu mortál 34 iha Manufahi

Governu sei hakoi restu mortál 34 iha Manufahi

Ministru Asuntu Kombatente Libertasaun Nasionál, Julio Sarmento da Costa ‘Meta Mali’. Imajen Tatoli/Egas Cristóvão

DILI, 01 agostu (TATOLI)–Governu liuhosi Ministériu Asuntu Kombatente no Libertasaun Nasionál (MAKLN), iha loron 04 agostu 2022 sei hakoi restu mortál hamutuk 34 iha munisípiu Manufahi.

“Nu’udar Ministru, iha obrigasaun atu mai relata ba Primeiru-Ministru,” Ministru Asuntu Kombatente Libertasaun Nasionál, Júlio Sarmento da Costa ‘Meta Mali’, hateten hafoin hasoru malu ho Xefe Governu, iha Rezidénsia Farol, segunda ne’e.

Restu mortál iha Manufahi hamutuk na’in-34, maibé na’in-32 mak identifikadu ho identidade kompletu, enkuantu na’in-rua deskoñesidu.

“Tanba ne’e, hafoin ida-ne’e ami sei tetu filafali iha loron 20 agostu tenki hakoi tan fali iha Aileu, kontinua ba postu administrativu Quelecai no Laga, munisípiu Baucau, kuandu posível sei hakoi tan sira iha munisípiu seluk. Molok hakoi, Prezidente Repúblika sei dekreta uluk, tanba ne’e maka tempu badak Xefe Estadu sei dekreta,” nia akresenta.

Notísia relevante: MAKLN sei haloot restu mortál 610 iha Same-Aileu-Quelicai-Metinaro

Restu mortál iha territóriu Timor hamutuk 9.000 resin, dadaun iha ona osuáriu. Nune’e, iha Quelecai 300 resin, Laga kuaze 400, Ermera kuaze 5.000, Ainaro 3.000 resin.

“Restu mortál to’o agora mós kee lapara, maibé restu mortál sira ne’e la’ós Natabora-oan maibé ema hosi Maubisse, Aileu, Hatubuilico, Ainaro, ne’ebé halai bá mak mate iha ne’ebá. Agradese tebes tanba Natarbora-oan sira badinas tebes hodi kee ruin ne’ebé la’ós sira-nia inan ka aman, maibé sira hadomi de’it ho fuan katak mate ba rai ida-ne’e hodi hetan independénsia hodi ita hotu goja na’in lamai kee mós ami kee. Ida-ne’e mak ema sira halo, tanba ne’e maka mate-ruin sira iha ne’ebá ne’e barak liu, tanba baze apoiu kuandu rahun, mate ikus liu ne’e mate iha ne’ebá la’ós mate tanba kilat musan maibé tanba hamlaha,” nia esplika.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!