iklan

NASIONÁL

MAKLN sei haloot restu mortál 610 iha Same-Aileu-Quelicai-Metinaro

MAKLN sei haloot restu mortál 610 iha Same-Aileu-Quelicai-Metinaro

Restu mortál ne’ebé haloot iha osoáriu munisípiu Covalima, postu administrativu Maucatar, Munisípiu Covalima. Imajen Tatoli/Celestina Teles.

DILI, 26 jullu 2022 (TATOLI)—Sekretáriu Estadu Asuntu Kombatente Libertasaun Nasionál (SEAKLN), Júlio da Conceição ‘Loro Mesak’, hateten iha tinan ne’e Ministériu Asuntu Kombatente Libertasaun Nasionál (MAKLN) hamutuk ho SEAKLN sei haloot restu mortál hamutuk 610 iha munisípiu Manufahi, Aileu, Dili no Baucau.

Notísia Relevante: Governu sei responsabiliza haloot restu mortál iha munisípiu

“Tuir loloos ita haloot restu mortál 34 iha Manufahi maibé tanba Prezidente Repúblika, José Ramos Horta, ba rai-li’ur, horisehik mak foin mai no seidauk dekreta, entaun ita adi’a fali ba loron 04 agostu 2022,” Loro Mesak hateten ba Agência TATOLI, iha nia knar fatin Caicoli, Dili, tersa ne’e.

Iha loron 04 agostu, nia hateten, planu sei hahú haloot restu mortál iha munisípiu Manufahi, postu administrativu Same, hafoin iha Aileu no postu administrative Quelicai, no ikus liu iha Metinaro.

“Serimónia haloot restu mortál hirak ne’e, ita hahú hosi Same ho restu mortál hamutuk 34, depois iha 20 agostu halot restu mortál 68 iha Aileu, kontinua halot restu mortál 502 iha postu administrativu Quelicai nian iha loron 10 setembru no ikus mak ita ba halot tan restu mortál neen (6) iha Jardim dos Herois Metinaro, Dili,” Loro Mesak haktuir.

Tuir nia, restu mortál balun sei haloot fali iha tinan oin tanba semitériu sira iha munisípiu balun to’o agora sei iha prosesu konstrusaun nia-laran.

“Ita seidauk bele haloot hotu restu mortál sira hotu iha tinan ne’e, no hein katak konstrusaun semitériu ramata horu ona mak ita sei haloot hotu restu mortál sira-ne’ebé rai hela iha osoáriu,” nia dehan.

Antes ne’e, MAKLN ho SEAKLN planeia ona atu haloot restu mortál hamutuk 1.000-resin iha tinan ne’e nia laran maibé la konsege tanba razaun balun, entaun iha tinan 2022 ne’e Governu sei haloot restu mortál 610 hosi restu mortál sira iha territóriu nasionál hamutuk 14.000-resin ne’e.

“Restu mortál desde tinan 2008 mai to’o agora hamutuk 14.000-resin no hosi totál ne’e iha tinan 2022 bazea ba planu atu haloot restu mortál hamutuk 610,” nia dehan.

Jornalista : Osória Marques

Editór      : Cancio Xiemenes

iklan
iklan

Leave a Reply

iklan
error: Content is protected !!