INSS sei aplika BI ba pagamentu idozu-invalidéz iha 2023
DILI, 01 agostu 2022 (TATOLI)–Prezidente Konsellu Administrasaun Institutu Nasionál Segurasna Sosiál (INSS), Longuinhos Armando Leite, hateten INSS sei aplika Billete de Identidade (BI) ba prosesu pagamentu ba idozu no invalidéz iha tinan 2023.
Notísia Relevante: INSS simu reklamasaun idozu-invalidéz faze daruak kuaze 700
“Ita nafatin halo pagamentu ba ita-nia ferik katuas sira ho uzu kartaun eleitorál maibé tinan oin ita tenke uza ona BI. Ami ezije duni BI tanba kartaun eleitorál ne’e ita uza hodi tuir eleisaun no maiória ita-nia ferik-katuas sira nia BI seidauk iha. Entaun faze ahuluk tinan ne’e, ita nafatin halo pagamentu ba sira hodi uza de’it kartaun eleitorál,” Longuinhos Leite hateten ba Agência Tatoli, iha nia kna’ar fatin Caicoli, Dili, segunda ne’e.
Iha tinan oin, presiza duni utiliza BI hodi bele halo prosesu pagamentu refere, tanba antes ne’e sira mós halo ona enkontru ho parte Ministériu Justisa (MJ) nune’e MJ liuhosi ninia Notariadu hodi ajuda no fasilita idozu no invalidés sira.
“Ami enkontru dala ida ona ho Vise Ministra Solidariedade Sosiál no Inkluzaun ho Ministru Justisa katak ba oin ita tenke kria duni kondisaun para oinsá fasilita atu ferik-katuas sira iha BI. Ita halo ida-ne’e tanba regulamentu hosi banku mós hateten katak kuandu ita halo atividade ida liga ho osan, tenke uza ID tolu (BI, kartaun eleitorál no RDTL) para halo balansu,” nia hatutan.
Tanba ne’e, agora ba oin tenke prepara daudaun ona hodi bele uza iha tinan oin maibé agora ne’e sei nafatin uza kartaun eleitorál hodi simu osan maibé tinan oin ne’e tenke uza ona BI.
“Agora daudaun pagamentu la’o hela no ita la ezije ferik-katuas atu hatudu BI maibé ba oin tenke prepara ona, nune’e tinan oin ita uza de’it ona. Atu halo preparasaun ba ida-ne’e mak ita tenke servisu hamutuk ho Governu liu-liu parte Notariadu hodi oinsá mak bele fasilita ferik-katuas sira bele hetan BI ne’e,” nia dehan.
Jornalista : Osória Marques
Editór : Cancio Ximenes
