INSS simu reklamasaun idozu-invalidéz faze daruak kuaze 700
DILI, 01 agostu 2022 (TATOLI)–Prezidente Konsellu Administrasaun Institutu Nasionál Segurasna Sosiál (INSS), Longuinhos Armando Leite, hateten pagamentu ba idozu no invalidéz ba faze daruak 2021 nian ne’e INSS simu reklamsaun kuaze 700.
Notísia Relevante: PM Taur lansa pagamentu subsídiu $50 ba idozu iha Liquiça
“Ita simu reklamasaun besik 700 no iha pagamentu faze dahuluk tinan ne’e, ita halo uluk pagamentu ba reklamante ema kuaze 700 ne’e, depois hotu mak ita foin hahú fali ho pagamentu baibain ba ita-nia ferik-katuas sira,” Prezidente INSS ne’e hateten ba Agência TATOLI, iha nia kna’ar fatin Caicoli, Dili, segunda ne’e.
Hosi totál ne’e, idozu ho invalidéz balun dokumentu mak sala no balun fali bainhira ekipa tékniku atu halo pagamentu to’o iha suku sira laiha fatin, nune’e téknika labele hein de’it ida-ne’e no tenke ba fatin seluk hodi halo pagamentu.
To’o agora, ekipa téknika kontinua hela pagamentu ba ferik-katuas iha Timor-Leste no tuir informsaun ne’ebé mak INSS simu katak fulan-agostu ne’e, munisípiu Covalima sei konklui nia pagamentu.
Lista idozu no invalidéz ba tinan 2022 nian ne’e, benefisiáriu hamutuk 103.108 mak sei simu subsídu ho orsamentu hamutuk miliaun $62.
Tuir nia, iha 09 dezembru 2021, deputadu sira iha Parlamentu Nasionál (PN) aprova proposta – lei númeru 147 hodi aumenta subsídiu ba idozu no invalidé sa’e na $50 kada fulan kompara ho antes ne’e $30.
Tanba, nia esplika, hosi artigu 20 kona-ba subsídiu apoiu idozu no invalidéz kria hosi dekretu-lei númeru 19/2008, 19 juñu, iha tinan 2022 montante subsídiu $50 kada fulan, ho nune’e tinan ne’e osan aumenta ba millaun $62.
Notísia Relevante: 2022, INSS selu subsídiu apoiu idozu no invalidéz millaun $62
Jornalista : Osória Marques
Editór : Cancio Ximenes
