MAKLN sei reverifika dadus veteranu pendente 6,177 iha territóriu nasionál
DILI, 01 agostu 2022 (TATOLI)–Sekretáriu Estadu Asuntu Kombatente Libertasaun Nasionál (SEAKLN), Júlio da Conceição ‘Loro Mesak’, hateten molok fulan-dezembru tinan ne’e, Ministériu Asuntu Kombatente Libertasaun Nasionál (MAKLN) ho SEAKLN sei reverifika dadus veteranu pendente 6,177 iha teritórriu nasionál.
Notísia Relevante: Governu sei forma ekipa verifika dadus pendente veteranu grau 4-7
“Molok dezembru 2022, MAKLN ho SEAKLN sei halo reverifikasaun ba dadus veteranu pendente 6,177 hosi tinan 2003 ho 2005 nian,” Loro Mesak hateten ba Agência Tatoli iha nia kna’ar fatin Caicoli, Dili.
Hosi totál dadus veteranu pendente iha leten ne’e, nia dehan, tanba ho razaun la tuir sira-nia sakrifísiu no luta ba rai ida-ne’e.
“Iha veteranu 4-7 ne’ebé uluk konkorda no simu tiha osan ho montante $1,380, maibé iha fali dehan ha’u la simu ida-ne’e tanba ha’u ema kastigu ha’u no destera ha’u depois ha’u mai atu simu 4-7 ne’e lae, ne’e ha’u la simu,” nia esplika.
Maibé, nia dehan, atu reverifika ne’e sei hein lai tékniku verfikasaun iha terrenu ne’e tanba daudaun ne’e sira sei halo hela verifikasaun ba dadus veteranu ba tinan 2009 nian mak sei hahú halo reverifikasaun ba dadus veteranu 2003 ho 2005 nian.
Tanba, tuir kalendáriu ne’ebé mak Governu iha katak fulan-novembru tenke termina ona no kompleta de’it mak Munisípiu Baucau iha novembru tinan ne’e.
Loro Mesak dehan iha prosesu reverifisaun dadus veteranu ne’e sei iha mudansa bainhira halo entrevista ho na’in rasik, depois mak parte nasionál deside fali atu simu osan hira.
Notísia Relevante: MAKLN prepara ekipa re-verifika dadus veteranu rejistadu iha 2009
Jornalista : Osória Marques
Editór : Cancio Ximenes
