iklan

EKONOMIA, HEADLINE

MAP hasoru difikuldade orsamentu la sufisiente hadi’a tratór

MAP hasoru difikuldade orsamentu la sufisiente hadi’a tratór

Kondisaun tratór a’at ne’ebé para iha Servisu Agrikultura munisípiu Baucau, tersa (13/07). Imajen TATOLI/Natalino Belo

DILI, 01 agostu 2022 (TATOLI)—Ministériu Agrikultura no Peska (MAP) liuhosi Diresaun Nasionál Agríkola no Ortikultura ka Diresaun Jerál Agrikultura, hasoru difikuldade orsamentu la sufisiente atu hadi’a tratór a’at sira.

Tuir Xefe Departamentu Mekanizasaun Produsaun Alimentár no Jestaun Pos-kolleta, Suzana Constâncio Vilanova, diresaun kada tinan sempre submete orsamentu ho montante boot atu halo manutensaun, maibé sempre halo redusaun.

“Ami sente triste tanba ita-nia komunidade halerik hakarak halai natar, maibé tratór laiha tanba orsamentu tinan ne’e no tinan oin ba manutensaun tratór tau de’it mak $100.000, ida-ne’e ita bele troka óleu filtru sira, maibé ba manutensaun labele tanba tratór sira ne’ebé ita uza ne’e loloos to’o tinan-lima to’o 10 mak foin halo manutensaun maibé agora liu ona tinan-15, ita presiza orsamentu boot halo manutensaun,” Xefe Departamentu hateten ba Agência Tatoli iha ninia knaar fatin, MAP, Comoro, segunda ne’e.

Notísia relevante: Komisaun D rekomenda MAP aumenta orsamentu manutensaun tratór iha Baucau

MAP aprezenta ona orsamentu manutensaun hamutuk millaun $3 ba tinan ne’e, maibé ikus mai Ministériu Finansa (MF) halo redusaun ho objetivu tinan oin atu sosa tratór médiu hamutuk unidade 45.

“Ita-nia dadus, tratór ne’ebé iha 323, hosi númeru ne’e 56 mak tama ona ba leilaun, kondisaun a’at kma’an unidade 121 no kondisaun di’ak 146, maibé númeru kondisaun di’ak ne’e mós la permanente tanba tratór sira  kleur ona, sosa desde tinan 2006 to’o 2017,” nia akresenta.

Kona-ba jestaun administrasaun, tratór sira fahe ona ba munisípiu maibé orsamentu manutensaun sei sentraliza iha MAP nasionál.

“Ita-nia difikuldade mak tratór sira a’at iha munisípiu sira barak maibé ita orsamentu la to’o atu halo manutensaun,” nia tenik.

Operadór no tékniku sira hodi opera no asegura tratór sira iha terrenu, ne’ebé operadór sira mantein nafatin serbisu hanesan fila-rai no seluk tan, maibé situasaun ne’ebé akontese iha terrenu mak orsamentu la to’o atu halo manutensaun ba tratór sira ne’ebé iha.

“Entaun operadór sira ne’e apoiu malu, ida ne’ebé tratór di’ak ajuda fali maluk ne’ebé tratór a’at. Esforsu lubuk ida mak ita halo maibé orsamentu laiha ne’e hanesan de’it, tanba ne’e buat ne’ebé ami presiza mak ita tau orsamentu atu sosa tratór foun, maibé tenke tau mós orsamentu ba manutensaun nune’e antes foun ne’e mai ita bele hadi’a mákina tuan sira,” nia sujere.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!