EKONOMIA, HEADLINE

MTKI konklui ona distribuisaun Cesta Bázika ba benefisiáriu 19.478

MTKI konklui ona distribuisaun Cesta Bázika ba benefisiáriu 19.478

Atividade distribuisaun Cesta Bázika faze daruak. Imajen/MTKI

DILI, 01 agostu 2022 (TATOLI)–Ministériu Turizmu Komérsiu no Indústria (MTKI) konklui ona distribuisaun produtu Cesta Bázika iha suku Ritabou, munisípiu Bobonaro ba benefisiáriu 7.711 no suku Poetete, munisípiu Ermera ba benefisiáriu 11.768, nune’e totál benefisiáriu hamutuk 19.478.

“Dadus benefisiáriu hosi suku Ritabou ne’ebé mak simu ona sira-nia direitu produtu Cesta Bázika hosi aldeia Daetete hamutuk 573, Uat 905, aldeia Ritabou 781, Na’ahui 501, Maganutu 533, Timatan 676, Ritiudu 393, Diruaben 755, Corluli 337, Halecou 661, Moleana 648, Samelaun 948,” refere nota ne’ebé Agência Tatoli asesu, segunda ne’e.

Notísia relevante: MTKI fahe ona Cesta Bázika faze daruak ba benefisiáriu 36.264

Nune’e, distribuisaun produtu Cesta Bázika iha suku Poetete, postu administrativu Ermera vila, munisípiu Ermera iha loron 30 juñu 2022, distribui hosi empreza Betuhei ba aldeia 12, ba benefisiáriu hamutuk 11.768 hanesan aldeia Tidibisi benefisiáriu hamutuk 325, Lequisi 1.826, Loblala 678, Biluli 1.368, Poepun 785, Taklela 1.442, Rematu 744, Samatrae 1.451, Urleteho 1.094, Villa 966, Urluli 636 no Gueguemara 441.

“Maski nune’e, iha suku Poetete rasik komunidade ne’ebé reklama sira-nia direitu hamutuk 1.010, bazeia ba lista ne’ebé rejista iha baze dadus estatál, totál populasaun hamutuk 154 maka seidauk simu sira-nia direitu,” nota hosi MTKI esplika.

Aleinde, distribuisaun Cesta bázika iha aldeia Baia-Leste, Fomento I to’o Fomento III, aldeia Naroman no aldeia Golgota hosi suku Comoro, postu administrativu Don Aleixo, munisípiu Dili, distribui hosi empreza Leader no suku Dato responsável ba distribuisaun hosi empreza Hanaroman Brilliant.

Prosesu distribuisaun produtu Cesta Bázika ne’e rasik hetan monitorizasaun hosi ekipa avaliasaun no monitorizasaun hosi MTKI, Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P), Provedoria Direitu Umanu no Justisa (PDHJ, sigla portugés) no Komisaun Antí-Korrupsaun (CAC, sigla portugés), ne’ebé identifika mosu fallansu oinoin maibé ekipa avaliasaun no monitorizasaun hamutuk ho ekipa responsável distribuisaun rezolve hodi fahe ba populasaun sira tuir direitu.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!