DILI, POLÍTIKA

PR Horta sei apoiu proposta hosi populasaun tuir kbiit ne’ebé iha

PR Horta sei apoiu proposta hosi populasaun tuir kbiit ne’ebé iha

Komunidade forma iha oin hodi hatama dokumentu ka proposta iha stop map ba Prezidénsia Repúblika hodi entrega ba Prezidente Repúblika, José Ramos Horta, iha Palásiu Prezidente Nicolau Lobato, Bairru Pite, tersa (26/07). Imajen Tatoli /Egas Cristovão.

DILI, 01 agostu 2022 (TATOLI)—Prezidente Repúblika (PR), José Ramos Horta, hateten Prezidénsia Repúblika sei haree avaliasaun tékniku tuir regra ba proposta sira hosi populasaun ne’ebé hatama hodi bele apoiu tuir kbiit ne’ebé iha.

Notísia Relevante: Palásiu Prezidensiál la simu proposta, komunidade lekar stop map iha odamatan

 

https://tatoli.tl/2022/07/26/palasiu-prezidensial-la-simu-proposta-stop-map-lekar-hela-iha-odamatan/

“Proposta tama ne’e, ita simu depois sei haree buat balun. Ha’u hanoin 1% ka 2% Prezidénsia repúblika bele ajuda no ajuda buat balun tuir regra no lei ne’ebé iha,” PR Horta klarifika ba jornalista sira iha edifisiu SAMES I.P, Kampung Alor, segunda ne’e.

Tan ne’e, proposta  balun ne’ebé tuir lei la’ós kompeténsia Prezidénsia Repúblika nian mak sei haruka ba Ministériu Solidariedade Sosiál no Inkluzaun (MSSI) no Ministériu Obras Públika (MOP) hodi haree.

“Primeiru-Ministru rasik hatudu ba hau tuir orsamentu Governu nian ida-ne’ebé mak prezidénsia kolabora ho Governu hodi ajuda ema sira ne’e. Tantu ha’u laiha problema, populasaun sira hatama proposta,” nia hateten.

Tuir nia, Prezidénsia Repúblika iha orsamentu liuhosi gabinete sosiál bele atende ba proposta  sira-ne’ebé iha nesesidade, mezmu nune’e Xefe Estadu la ko’alia totál Orsamentu hira mak prevee.

“Orsamentu mak Orsamentu Jerál Estadu prezidénsia nian iha elementu balun ha’u labele book orsamentu ne’e, maibé prezidénsia la’ós Ministériu Solidariedade Sosiál no la’ós Ministériu Obra Públika (MOP),” nia dehan.

Purtantu, buat balun ida-idak bele haree orsamentu Prezidente nia portál no Governu nian.

“Ha’u haree se bele book osan uitoan iha ne’e hodi ajuda ida-ne’e no ida-ne’eba bele. Maibé ida ne’e la’ós responsabilidade todan prezidénsia nian buat ne’ebé ha’u haree Governu mak tenke halo. Ha’u ko’alia tiha ona ho Primeiru-Ministru kolaborasaun di’ak ho Governu haruka ba Primeiru-Ministru ba nia staff ho nota oan ida favór tau matan ba ida-ne’e,” nia dehan.

Tanba, nia esplika, ida-idak haree orsamentu no prezidénsia nia orsamentu la’ós atu halo uma, negósiu ruma maibé Prezidénsia Repúblika haree no dalaruma ko’alia ho embaixada ruma oinsá atu fó tulun mós.

Ramos Horta dehan. la’ós foin nia parte sai Prezidente Repúblika mak fó apoiu ba populasaun maibé tinan sira-nia laran fó ona apoiu lubuk ba populasaun sira.

“Ha’u tinan sira ne’e nia laran, ha’u simu surat lubuk ida, la’ós ha’u mesa-mesak maié balun ha’u ajuda no balun la konsege ajuda. Hanesan tinan sira-nia laran kuda ai-oan rihun 300 iha Baguia, munisípiu Baucau hamutuk ho grupu ida naran Musan Ida, ha’u mak mobiliza apoiu hosi Uniaun Europeia ba sira,” nia dehan.

Aleind ene’e, Ramos Horta mós apoiu grupu balun iha Eraulo-Ermera tinan 20 nia laran, apoiu iha Laclubar halo eskola ida no apoiu sira  seluk tan ne’ebé la’ós agora sai Prezidente Repúblika mak halo.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!