DILI, 01 agostu 2022 (TATOLI)—Xefe Estadu, José Ramos Horta, rekomenda ba Governu halo parseria ho kompañia internasionál hosi nasaun seluk atu loké fábrika medikamentu iha rai-laran.
Notísia Relevante: SAMES-parseiru kapasita farmaséutiku halo armazenamentu ai-moruk iha sentru saúde
“Ha’u hanoin Timor-Leste atu halo liután mak produsaun médikamentu labele 100% hosi li’ur,” Xefe Estadu ne’e hateten ba jornalista sira bainhira hala’o vizita ba Serviço Autónomo de Medicamentos e Equipamentos de Saúde (SAMES), Institutu Públiku, iha Kampung Alor, Dili, segunda ne’e.
Prezidente Repúblika (PR) ne’e rekomenda, Timor-Leste atu halo kolaborasaun ho rai sira hanesan Brazíl, Cuba, Portugál, Indonézia hodi haree oinsá dezenvolve loké fábrika medikamentu iha timor-Leste.
“Ha’u-nia rekomendasaun mak ne’e Timor-Leste tenke haree kolaborasaun ho Brazíl ho Cuba no Portugál, Indonézia halo fábrika medikamentu ba ita rasik no ba merkadu iha li’ur,” nia dehan.
PR Horta temi Portugál nune’e bele tau estandár Uniaun Europeia (UE) nian no Brazíl produtór mundiál ba aimoruk jenériku no Kuba sira fábrika medikamentu barak inklui ho Xina.
Nune’e, bele haree parseria uza osan fundu mina-rai hodi halo investimentu duni iha rai-laran sai investimentu di’akliu duké daudaun 100% ai-moruk mai hosi li’ur de’it.
“Garante auto-sufisiente 100% maibé pelumenus 30%, nune’e aimoruk ita uza bele halo iha rai laran,” nia hateten.
PR fó hanoin, se Timor-Leste laiha ema tékniku sufisiente bele halo parseria public partnership se iha kompañia internasionál ne’ebé iha interese entaun bele halo.
Notísia Relevante: PR Horta vizita SAMES
Jornalista : Nelson de Sousa
Editór : Cancio Ximenes