VIQUEQUE, 02 agostu 2022 (TATOLI)—Eskola Ensinu Sekundáriu Jerál (ESJ) Sabika Besi Kulit Uatulari, munisípiu Viqueque, presiza morru protesaun.
“Ami-nia seguransa iha eskola ladún garantidu tanba morru protesaun laiha. Entaun ema deskoñesidu kalan mai sobu hodi naok sasán eskola ne’ebé Estadu fó ba ami hanesan mic no sasán saúde ne’ebé estudante sira uza hodi halo prátika inklui sasán sira seluk, maibé ami seidauk identifika hotu sasán sira ne’ebé lakon,” Diretór ESJ Sabika Besi Kulit Uatulari, Adelino da Crus, informa ba Agência Tatoli, iha ninia knaar fatin, suku Matahoi, tersa ne’e.
Notísia relevante: Estudante sekundáriu Sabika Besi Kulit Uatulari balun ladun hatene lee
Diretór ne’e dehan, bainhira morru protesaun laiha, animál bele tama livre no ema balun kalan tama sala aula hodi soe foer.
“Bainhira dadeer estudante sira mai tuir prosesu aula prezensiál, sira tenke hamoos tiha buat foer sira mak foin aula la’o, entaun ida-ne’e difikulta ami no lakon tempu,” nia akresenta.
Aleinde ne’e, eskola ne’e falta bee-moos hodi uza ba toilet rua inklui menus sala aula.
“Daudaun ne’e sala aula hamutuk 18, maibé sala lima maka kondisaun grave, bainhira tempu udan estudante sira labele uza ba prosesu aprendizajen. Ami mós falta sala aula, tanba númeru estudante boot, sala aula balun ho kondisaun grave ho nune’e Governu presiza mós tau-atensaun,” nia tenik.
ESJ Sabika Besi Kulit Uatulari daudaun ne’e menus profesór no karteira eskolár (meza no kadeira)
“Baibain estudante sira uza kadeira masa maka tuur hodi hakerek iha hitin leten, la’ós tau iha meza. Kondisaun ne’e sai preokupasaun ida ba eskola ne’e. Ha’u hato’o ona proposta ba Servisu Edukasaun Munisípiu Viqueque kona-ba preokupasaun hirak ne’e, maibé to’o agora seidauk iha resposta ruma, aleinde ne’e ha’u hato’o preokupasaun sira-ne’e direta ba Vise-Ministru Edukasaun Juventude no Desportu maibé seidauk fó resposta ida,” Diretór eskola salienta.
Tuir dadus, profesór permanente iha Eskola ESJ Sabika Besi Kulit hamutuk na’in-17, profesór kontratadu ida no profesór voluntáriu 10, nune’e totál profesór 28 maka daudaun hanorin no estudante hosi klase 1 to’o 3 totál hamutuk na’in-1.008.
Jornalista : Vitorino Lopes da Costa
Editora : Julia Chatarina
