COVALIMA, 02 agostu 2022 (TATOLI)–Xefe suku Ogues , Faustino Cardoso hateten, Governu implementasaun Program Mão de Obra Postu Administrativu (PMOPA) iha suku Ogues, postu administrativu Maucatar tinan fiskal 2022 ne’e fó prióridade ba programa hamoos valeta, hamos dalan ninin no kuda ai-oan iha rai erosaun.
Notísia Relevante: Covalima lansa PMOPA simultaneamente iha postu administrativu neen
“Governu liuhosi autoridade munisipál implementasaun PMOPA iha suku Ogues, postu administrativu Maucatar fó prióridade ba programa sira hanesan hamoos valeta, hamoos dalan ninin no kuda ai-oan iha área rai erosaun ne’ebé ami identifika ona fatin,” Faustino Cardoso informa ba Agência Tatoli, iha suku Ogues, tersa ne’e.
Suku Ogues fó prióridade mós ba kuda ai-oan iha rai erosaun sira hanesan iha área Nadak Petamina Merkadu tuan, eskola filiál Nadak nia kotuk tanba rai erosaun makaas kuaze metru 300-resin iha aldeia Orun, kuda ai-oan iha bee-matan Otik iha aldeia Foho-rua ne’ebé rai monu kuaze metru rua-resin ona no pesiza halo halo konservasaun hikas hodi halo prevensaun ba erosaun.
Nia informa, oras ne’e daudaun trabadór na’in-20 foku hamoos valeta no dalan ninin hafoin ne’e mak sira foin kuda ai-oan iha área ne’ebé mak sira identifika ona.
Implementasaun PMOPA ba faze dahuluk traballadór na’in-20 mak sei servisu durante loron 20 no implementasaun faze daruak mós trabadór na’in-20 sei kontinua servisu hanesan ho implementasaun iha faze dahuluk ne’e.
Antes ne’e, iha segunda (01/08) tinan ne’e, Reprezentante Administradór Munisípiu Covalima Francisco de Jesus Alves hateten, Munisípiu Covalima simultaneamentu halo ona lansamentu implementasaun programa Mão de Obra Postu Administrativu (PMOPA) iha postu administrativu neen (6).
Antes ne’e, iha loron 08 fulan-jullu tinan 2022, Ministériu Administrasaun Estatál (MAE) halo sensibilizasaun Matadalan Implementasaun programa Mão de Obra ba autoridade Covalima.
Munisípiu Covalima hetan alokasaun OJE 2022 hosi Ministériu Administrasaun Estatál (MAE) hamutuk $3,990.360. ne’ebé aloka ba saláriu no vensimentu, bens servisu, transferénsia públiku, kapitál menór no kapitál dezenvolvimentu aumenta ho orsamentu programa Mão de Obra Postu administrativu (PMOPA).
Hosi total orsamentu refere MAE tranferese orsamentu ba programa Mão de Obra Postu Administrativu (PMOPA) iha Covalima hamutuk $ 782,102 ba iha konta bankaria munisípiu nian.
Jornalista : Celestina Teles
Editór : Cancio Ximenes
