COVALIMA, POLÍTIKA

Covalima lansa PMOPA simultaneamente iha postu administrativu neen

Covalima lansa PMOPA simultaneamente iha postu administrativu neen

IGE-IP apoiu servisu melloramentu estrada hosi Aldeia Teda ba Aldeia Tobur, Munisípiu Covalima. Imajen/IGE.IP

COVALIMA, 01 agostu 2022 (TATOLI)–Reprezentante Administradór Munisípiu Covalima, Francisco de Jesus Alves, hateten munisípiu Covalima halo ona lansamentu implementasaun Programa Mão de Obra Postu Administrativu (PMOPA) ho simultaneamente iha postu administrativu neen (6) iha munisípiu Covalima.

Notísia Relevante: Governu sensibiliza matadalan PMOPA ba autoridade Covalima

“Implementasaun programa mão de obra hanesan ha’u simu orientasaun hosi administradór munisípiu Covalima iha semana kotuk. Ohin, postu administrativu neen (6) simultaneamente halo lansamentu ba PMOPA, tanba orsamentu transfere ona ba konta bankaria,” Francisco de Jesus Alves informa ba Agência Tatoli iha resintu Administrasaun Munisípiu Covalima iha Sukaer Laran, segunda ne’e.

Bazea ba matadalan implementasaun programa Mão de Obra Postu Administrativu (PMOPA) katak faze dahuluk sira sei uza orsamentu 50% ne’ebé kada postu administrativu ida aloka orsamentu rihun $100-resin hosi orsamentu refere.

“Faze dahuluk ne’e ita tama ho 50% ekivalente ho osan $50.000-resin tanba totál orsamentu implementasaun PMOPA iha postu administrativu hitu (7) ne’e hamutuk $782.000 hodi orsamentu sei fahe ba postu adminitrativu-ida sei hetan 50%,” nia dehan.

Implementasaun PMOPA iha postu administrativu sira-ne’e prioridade ba halo manutensaun no hamoos esgotu, halo manutensaun ba estrada, hamoos lixu iha fatin públiku, tanba matadalan PMOPA ko’alia klaru katak labele halo konstrusaun foun maibé halo de’it manutensaun no hamoos esgotu.

Antes ne’e iha loron 08 fulan-jullu tinan 2022, Ministériu Administrasaun Estatál (MAE) halo sensibilizasaun matadalan imlementasaun programa Mão de obra Postu Administrativu ba autoridade Covalima.

Munisípiu Covalima hetan alokasaun (OJE 2022) hosi Ministériu Administrasaun Estatál (MAE) hamutuk $3,990.360 ne’ebé aloka ba saláriu no vensimentu, bens servisu, transferénsia públiku, kapitál menór no kapitál dezenvolvimentu aumenta ho orsamentu Programa Mão de Obra Postu Administrativu (PMOPA).

Hosi totál orsamentu refere, MAE transfere orsamentu ba Programa Mão de Obra Postu Administrativu (PMOPA) iha Covalima hamutuk $782,102 ba iha konta bankaria Munisípiu nian.

Antes ne’e, iha loron 14 fulan-dezembru tinan 2021, Parlamentu Nasionál aprova OJE 2022 ba Covalima hamutuk $3.990,360 ne’ebè aloka ba saláriu no vensimentu $1,388,795, bens no servisu $1,075,531, transferénsia públiku $1,132,428, kapitál menór $40,000 no kapitál dezenvolvimentu $353,606.

Notísia Relevante: Trimestre daruak: Covalima ezekuta OJE 2022 atinje ona 43,7%

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!