COVALIMA, 02 agusto 2022 (TATOLI)–Koordenadór BTL, E.P Covalima, Castro Dodi Ramos hateten, komunidade munisípiu Covalima ne’ebé hela ona área urbana uma-kain hamutuk 1,665 ne’ebé asesu ona bee-moos.
Notísia Relevante: BTL, E.P instala ona mákina bomba bee foun iha Sukabi Laran
“Dadus ne’ebé ami iha área urbana komunidade 1,656 mak asesu ona bee-moos ho totál populasaun 10,965 ne’ebé hosi suku Debos, suku Ogues, Camanasa iha bairru Ladi, suku Suai Loro aldeia Sukabi Laran,” Castro Dodi Ramos relata dadus ne’e ba Agência Tatoli, iha suku Ogues, tersa ne’e.
Bazea ba planu foin lalais loke ona konkursu atu kobre tan parte suku Camanasa no Suai Loro sei kobre aldeia Mane Ikun no Lo’o maibé BTL, E.P sei menus rekursu umanu tanba funsionáriu ho na’in-13 ne’ebé atu kontrola bee-moos iha área urbana.
Tanba BTL, E.P Covalima rekomenda nafatin ba BTL, E.P nasionál atu halo rekrutamentu ba funsionáriu na’in-25, nune’e kontrola distribui bee-moos bele hotu kofre iha área urbana.
Ho limitasaun funsionáriu iha BTL, E.P Covalima, tanba ne’e husu ba komunidade uza bee-moos tenke kuidadu tanba ema seluk presiza atu asesu bee-moos no labele halo ligasaun bee ho illegál, hasoru problema kona-ba bee-moos bele mai hakarak ba iha edifísiu BTL, E.P.
“Komunidade uza bee-moos ho kuidadu tanba ema seluk mós presiza bee-moos labele halo ligasaun ilegál bainhira hasoru kona-ba problema bee-moos bele ba iha edifísiu BTL, E.P ami-nia ekipa sira bele rezolve problema,” nia dehan.
Durante ne’e BTL, E.P mós identifika komunidade sira dada bee-moos ho ilegál foti medida hodi fó xamada no ba segundu sei hakotu ligasaun bee-moos, nune’e sira bele kumpre regra sira hafoin halo fali ligasaun aplika multa ho hodi selu multa $55,00.
Ho nune’e BTL, E.P Covalima durante ne’e dade bee-moos ba komunidade ho de’it setengah inci ba empreza sira mak dada bee-moos ho satu inci.
Tanba ne’e, BTL, E.P halo hela preparasaun tanba agora tempu bailoron ne’e volume bee menus, nune’e bee la sufisiente sei halo perfurasaun bee iha área Ladi ho Sukabi Laran atu aumenta volume bee-moos ne’ebé loke ona konkursu no kompañia 25 mak konkore ona.
Bee ne’e tanke rezervatóriu metru kúbiku 50 kanaliza hosi aldeia Tabakolot ba suku Camanasa ba to’o iha Suai Loro.
Jornalista : Celestina Teles
Editór : Cancio Ximenes
