DILI, 02 agostu 2022 (TATOLI)–Gabinete Inspesaun Jerál Ministériu Ensinu Superior Siénsia no Kultura (MESSK) devolve hikas osan millaun $1 resin ba kofre Estadu, ne’ebé instituisaun ensinu superior públiku no privadu la konsege ezekuta hotu iha pagamentu izensaun propina ba estudante.
Inspetór Jerál MESSK, Higino Alves, hateten, VIII Governu konstitusionál aloka orsamentu millaun $5,4 iha tinan kotuk, atu apoiu subsídiu izensaun propina ba estudante sira iha kada universidade, ne’ebé bazeia ba dadus iha estudante 66.106.
“Daudaun ami iha instituisaun ensinu superiór públiku no privadu hamutuk 18, maibé instituisaun ensinu superiór 16 maka devolve ona osan millaun $1 resin, ekivalente ho pagamentu propina ba estudante 15.689, maibé subsídiu hosi millaun $ 1,2 ne’e selu hotu ona. Ami kontinua hein hosi Universidade Dili (UNDIL) no Institute of Bussiness (IOB) atu kontinua devolve,” Inspetór Jerál MESSK informa ba Agência Tatoli, iha ninia knaar fatin, Colmera, tersa ne’e.
Notísia relevante: MESSK hapara ona inzensaun propina ba estudante universitáriu
Instituisaun Ensinu Superiór sira ne’ebé maka devolve ona osan ne’ebé la konsege gasta ba pagamentu izensaun propina, maka hanesan Institutu Politékniku Betano (IPB), Institutu Filozofia São Francisco de Sales (IFSFS), Institutu Siénsia Relijioza(ICR), no East Timor Coffee Institute (ETCI).
Nune’e mós, Institutu Professional de Canossa (IPDC), Institutu Boa Ventura Timor-Leste (IBTL), Institutu Siénsia Saúde (ICS), João Saldanha University (JSU), Institutu São João de Brito (ISJB), Dili Institute of Technology (DIT) Institutu Superior Cristal (ISC), Institutu Katólika Formasaun Profesór (ICFP), Institutu Superior Filozofia Teknolojia (ISFIT) universidade Oriental Timor-Lorosa’e (UNITAL), Universidade da Paz (UNPAZ) no Universidade Nasionál Timor-Lorosa’e (UNTL).
Ho nune’e, Higino Alves husu mós ba UNDIL no IOB atu aprezenta relatóriu ba MESSK, bazeia ba totál subsídiu ne’ebé maka simu ona.
Antes ne’e, MESSK asina ona akordu ho instituisaun ensinu superiór públiku no privadu, iha novembru tinan kotuk, kona-ba pagamentu izensaun propina ba faze daruak.
Jornalista : Tomé Amado
Editora : Julia Chatarina
