DILI, 02 agostu 2022 (TATOLI)—Ministériu Saúde (MS), liuhosi Diresaun Nasionál Farmásia no Medikamentu, hahú define tipu aimoruk lima hodi ba teste nia-kualidade iha Laboratóriu Therapeutic Goods Administration Austrália.
Ai-moruk tipu lima ne’e kompostu hosi ampicillin, Aspirin, Bisoprolol, Glibenclamide, no Oxytocin.
Notísia relevante: Laiha kualidade, MS apela labele fó aimoruk “dexamethasone no simvastatin ba pasiente
“Ita foti ai-moruk tipu lima ne’ebé mak tama iha sira nia kategória atu halo teste ba nia-kualidade. Nune’e ita hahú halo ona preparasaun ho orsamentu balun hodi manda tuir ajénsia DHL,” Diretór Nasionál Farmasia no Medikamentu (DNFM), Delfim da Costa Xavier Ferreira, hateten ba Agência TATOLI iha Hotel Timor, kuarta ne’e.
Diretór Nasionál ne’e informa kona-ba durasaun teste fulan-rua ka tolu de’it, maibé durante períodu teste kualidade Servisu Autónomu Medikamentu no Ekipamentu Saúde (SAMES) kontinua distribui ai-moruk tipu lima ne’e ba fasilidade saúde sira.
“Se karik rezultadu sai mak laiha kualidade, ita halo kedan intervensaun hodi rekolla iha fasilidade saúde tanba nia impaktu ba pasiente-sira ne’ebé konsumu ona la boot, maibé hemu ka konsumu ne’e kontinua moras nafatin ka la pasa de’it hosi moras ne’e,” nia afirma.
Amostra ba tipu ai-moruk lima ne’e sei foti hosi Armazein SAMES no klínika privadu sira ne’ebé durante ne’e komunidade konsumu barak.
Notísia relevante: MS presiza teste kualidade ai-moruk molok distribui ba sentru saúde sira
Jornalista : Felicidade Ximenes
Editór : Florencio Miranda Ximenes
