PN kontinua ezije Governu solusiona estudante nia pasaporte ne’ebé kaduka

DILI, 02 agostu 2022 (TATOLI)—Menbru Parlamentu Nasionál (PN), Deputadu António Verdiál de Sousa, kontinua ezije Governu atu solusiona estudante timoroan sira-nia pasaporte ne’ebé kaduka iha rai-li’ur.
Notísia Relevante: Komisaun G husu Governu solusiona estudante nia pasaporte ne’ebé kaduka
“Preokupasaun ne’e hato’o dala barak ona maibé laiha resposta nune’e kontinua husu Governu atu solusiona ita-nia estudante sira-nia pasaporte kaduka ona iha rai-li’ur,” Deputadu António Verdiál levanta iha reuniaun plenária komisaun pernamente iha PN, tersa ne’e.
Nia husu Ministéiru Justisa (MJ) hala’o servisu integradu ho Ministéiru Interiór (MI), Ministéiru Ensinu Superiór Siénsia no Kultura (MESSK), Ministéiru Negósiu Estranjeiru no Kooperasaun (MENK) atu iha seriedade hodi solusiona preokupasaun refere, tanba preokupasaun hosi estudante timoroan ne’ebé daudaun hala’o estudu iha nasaun seluk hanesan Indonézia, Filipina no sira seluk antes ne’e labele fila mai renova pasaporte tanba ho situasaun pandemia COVID-19.
Deputadu hosi bankada Governu ne’e dehan, antes ne’e hasoru ona Ministru Justisa hodi hato’o preokupasaun ida-ne’e no Ministru promete katak sei servisu hamutuk ho ministéiru relevante haree asuntu ne’e.
“Maibé realidade ita-nia oan sira eskola iha rai-li’ur depois ha’u vizita ba iha Jakarta-Indonézia hetan informasaun katak balun ema deporta ona no balun inan-aman mak apoiu sira hodi fila mai Timor, ida-ne’e responsabilidade hanesan nasaun ida-ne’e iha ne’ebé, to’o iha ne’ebé ita-nia asaun servi ita-nia povu ida-ne’e nune’e favór ida husu tau atensaun,” nia hateten.
Deputadu CNRT, Gabriel Soares, sekunda mós katak timoroan sira iha rai-li’ur sofre tebes ba iha sira-nia kitas, visa no pasaporte nune’e sira husu MESSK ho kooperasaun ministéiru seluk tau mákina ida iha Indonézia hanesan uluk hodi fasilita.
“Ida-ne’e ami hetan hosi ita-nia oan sira-ne’ebé eskola iha Indonézia balun de’it maibé parese barak liu ami labele hetan labele hato’o informasaun,” nia dehan.
Hatán ba kestaun ne’e, Governu liuhosi Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hateten nia-parte rejista hela preokupasaun ne’e no sei hato’o ba ministéiru relevante hodi bele responde.
Notísia Relevante: FRETILIN husu Governu solusiona estudante timoroan nia pasaporte ne’ebé kaduka
Jornalista : Nelson de Sousa
Editór : Cancio Ximenes

