DILI, 03 agostu 2022 (TATOLI)—Ministru Petróleu no Minerál (MPM), Víctor da Conceição Soares, aprezenta projetu dekretu-lei ba extensaun atribuisaun subsídiu kombustível, iha reuniaun Konsellu Ministru (KM) no hetan ona aprovasaun, kuarta ne’e.
Ho inisiativa ne’e, hanaruk prazu vijénsia atribuisaun subsídiu kombustível ba benefisiáriu sira to’o loron 31 outubru 2022, bazeia ba dekretu-lei númeru 18/2022, loron 19 abril.
“Dekretu lei ko’alia kona-ba estabelese rejime jurídiku atribuisaun subsídiu finanseira ida ho forma exesionál no tranzitória hodi hamenus impaktu ekonómiku hosi aumentu presu kombustível hodi fó ba operadór transporte públiku no kompradór kombustível ne’ebé maka destina ba atividade agríkola no peska,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu.
Notísia relevante: Estasaun kombustível Dili hahú simu voucher subsídiu kombustível hosi transporte públiku
Aleinde ne’e, kondisaun sira seluk ba atribuisaun subsídiu kombustível ne’ebé prevee antes ne’e nafatin sei mantein.
Portavós Governu dehan, ho hanoin ba kondisaun exesionál aumentu presu konbustível iha merkadu ne’ebé mantein la estável, Governu kontinua nafatin apoia operadór transporte públiku no kompradór kombustível ne’ebé destina ba atividade agríkola no peska, ho forma hodi hamenus impaktu hosi aumentu sira ba matéria prima ne’ebé importante tebes ba dezenvolvimentu ekonomia nasionál, hanesan presu kombustível.
Antes ne’e, iha loron 18 jullu, estasaun kombustível iha Dili ne’ebé Governu kontrata hahú simu voucher subsídiu kombustível hosi benefisiáriu sira.
Kada benefisiáriu hetan subsídiu kombustível litru 450 ba fulan-tolu, ne’ebé kada fulan sei hetan litru 150.
Jornalista : Antónia Gusmão
Editora : Julia Chatarina
