EDUKASAUN, HEADLINE, MUNISÍPIU, VIQUEQUE

Estudante 1.008 ESJ Sabika Besi Kulit sei partisipa ezame daruak

Estudante 1.008 ESJ Sabika Besi Kulit sei partisipa ezame daruak

Diretór Eskola ESJ Sabika Besi Kulit Uatulari, Adelino da Crus. Imajen Tatoli/Vitorino Lopes da Costa

VIQUEQUE, 03 agostu 2022 (TATOLI)-Diretór Eskola Ensinu Sekundáriu Jerál (ESJ) Sabika Besi Kulit Uatulari, Adelino da Crus, informa, estudante 1.008 iha eskola ne’e sei partisipa iha ezame  daruak iha loron 08 agostu.

“Konsellu profesór prepara ona matéria ezame daruak nian. Pontu ezame daruak daudaun prepara hotu no balun hahú print ona, rai hela edifísiu eskola, hein realiza ba ezame daruak nian,” Diretór hateten ba Agência Tatoli iha ninia knaar fatin, kuarta ne’e.

Parte eskola sei realiza ezame tuir kalendáriu hosi Ministériu Edukasaun Juventude no Desportu (MEJD).

Estudante finalista 287 hosi ESJ Sabika Besi Kulit maka sei partisipa iha ezame nasionál iha tinan 2022.

“Ami hato’o ona estudante sira-nia biografia ba edukasaun munisípiu Viqueque, hafoin munisípiu relata ba nasionál. Nune’e mós ami sei haruka tan valór estudante hosi ezame dahuluk no daruak hotu ba munisípiu,” nia hato’o.

Notísia relevante: Estudante finalista 2.942 iha Liquiçá sei partisipa ezame nasionál

Tuir kritériu, ba estudante klase 3 ne’ebé atu partisipa iha ezame nasionál, eskola tenke relata estudante nia naran kompletu, inan-aman nia naran komplentu, data no moris fatin estudante nian, inklui númeru estudante.

“Matéria kuaze ami hanorin hotu ona estudante sira. Bainhira matéria balun maka profesór sira seidauk hanorin, ha’u tenke obriga profesór sira hanorin,” nia subliña.

Tuir dadús kandidatu  estudante  ESJ Sabika Besi Kulit ne’ebé sei partisipa ba ezame nasionál  hosi Siénsia Sosiál Umanitáriu hamutuk 141 no Siénsia Teknolojia hamutuk 146, ho totál 287.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!