DILI, 03 agostu 2022 (TATOLI)–Estudante finalista 2.931 hosi Eskola Ensinu Báziku, Sekundáriu Jerál no Tékniku Vokasionál hosi munisípiu Manufahi sei tuir ezame nasionál ne’ebé sei realiza iha outubru tinan ne’e.
“Ami-nia dadus estudante finalista atu tuir ezame nasionál iha fulan-outubru ne’e hamutuk 2.931, kompostu hosi Ensinu Báziku 1.586, Ensinu Sekundáriu Jerál 1.108, no Ensinu Sekundáriu Tékniku Vokasionál 237,” Diretór Servisu Edukasaun Munisípiu Manufahi, Trinito Sarmento, relata ba Agência Tatoli via telefónika, kuarta ne’e.
Notísia relevante: Estudante finalista 2.942 iha Liquiçá sei partisipa ezame nasionál
Dadus estudante finalista atu tuir ezame hosi Manufahi ne’e submete hotu ona mai nasionál atu verifika, nune’e bainhira estudante sira simu diploma finál labele mosu problema iha dadus.
“Lista ka dadus estudante sira-nia ne’ebé eskola submete mai nasionál ne’e atribui mós ho dokumentu hanesan sertidaun baptizmu atu nune’e ministériu bele halo konfirmasaun atu labele sala iha tempu prienxe diploma,” nia akresenta.
Nune’e, daudaun foin rekolla dadus estudante finalista atu tuir ezame nasionál tinan 2022 hosi munisípiu haat hanesan Dili, Liquiçá, Manufahi no Viqueque, ho totál estudante 26.363.
Jornalista : Tomé Amado
Editora : Julia Chatarina
