DILI, 03 agostu 2022 (TATOLI)— Fundasaun Alola fó asisténsia tékniku ba Hospitál Nasionál Guido Valadares (HNGV), hodi fó akonsellamentu ba inan sira ne’ebé partu iha ospitál atu fó susubeen kinur ba bebé-sira foin moris.
“Ami servisu iha ne’e hodi ajuda no akonsella inan-sira ne’ebé mak partu mai atu fó susubeen kinur ba oan sira,” Koordenadora Fundasaun Alola iha Sentru Breastfeeding Café HNGV, Amelia Amaral Soares, hateten ba Jornalista sira iha knaar fatin Bidau, kuarta ne’e.
Notísia relevante: Susu been inan hasa’e imunidade labarik
Iha akonsellamentu ne’e, nia dehan hetan problema balun tanba inan balun partu, maibé problema iha susun hodi labele fó susubeen kinur ba bebé sira.
Hahú janeiru too jullu rejista inan-sira ne’ebé problema iha susun hamutuk 323, kompostu hosi janeiru na’in-47, fevereiru 42 marsu 51, abríl 49, maiu 50, juñu 36 no jullu 48.
“Tanba problema susubeen la sai ami tenke ajuda hadi’a ka hois susubeen kinur hodi fó ba bebé sira ne’ebé mak foin moris hodi konsumu atubele iha saúde ka imunidade forsa,” nia afirma.
Responsavél ne’e observa dalabarak inan sira partu hasoru problema susun, nune’e fó kedan susubeen formula ba bebé.
“Ami nafatin akonsella inan sira ne’ebé mak partu iha maternidade HNGV atu bainhira partus hotu labele fó susu been formula, maibé tenke fó susubeen kinur hodi dezenvolve bebé sira nia hanoin sai di’ak no dook hosi moras hotu,” tenik nia.
Maske, nia dehan ba inan-sira ne’ebé sofre tuberkoluze labele fó susubeen kinur ba bebé sira, maibé atu fó susubeen formula tenke hetan reseita hosi médiku sira.
Notísia relevante: MS enkoraja família apoia fó susubeen inan ba bebé
Jornalista : Felicidade Ximenes
Editór : Florencio Miranda Ximenes
