HEADLINE, SAÚDE

MS enkoraja família apoia fó susubeen inan ba bebé

MS enkoraja família apoia fó susubeen inan ba bebé

Ministra Saúde, Odete Maria Freitas Belo. Imajen Tatoli/António Daciparu

DILI, 01 agosto 2022 (TATOLI)— Ministra Saúde, Odete Maria Freitas Belo, enkoraja ba família sira iha territóriu nasionál atu apoia fó susubeen inan ba bebé sira tanba susubeen inan de’it mak hahán di’akliu ba bebé hotu-hotu.

Governante hato’o kestaun ne’e hodi  selebrasaun semana mundiál susubeen inan tinan 2022 ho tema globál mak “Eduka no Suporta”

“Tinan ida-ne’e, ita selebra tan semana mundiál fó-susubeen inan ba bebé. Susubeen inan de’it mak hahán di’ak liu ba bebé hotu-hotu,” Ministra Saúde hateten liuhosi nota ne’ebé Agência TATOLI asesu, segunda ne’e.

Ministériu Saúde mós kompromete hodi define no haforsa kapasidade pesoál saúde no liña frente sira atu promove, proteje no apoia fó-susubeen inan ba bebé iha nível sosiedade hotu-hotu.  Ministériu Saúde sei asegura kapasidade pesoál saúde sira, iha fasilidade saúde hotu-hotu iha Timor-Leste laran.

“Husu ba inan sira hotu atu keta haluha, fó kedas susubeen inan bainhira bebé moris, kontínua fó-de’it susubeen inan ba bebé durante fulan neen dahuluk no hafoin husi fulan-neen  ba leten kontínua fó-susubeen inan ba bebé hamutuk ho hahan komplementariu tuir bebé nia idade to’o tinan rua ka liu”.

Entretantu, Diretora Jerál Organizasaun Mundiál Saúde  iha Rejiaun Sudeste Aziátiku, Poonam Khetrapal Singh,  husu ba membru Estadu sira iha rejiaun ne’e atu marka semana mundiál  fó-susubeen inan,  hodi proteje, promove no suporta fó-susubeen inan, atu ajuda institusionaliza ba iha sistema kuidadu saúde.

Fó-susubeen inan eskluzivamente iha fulan neen nia laran, kontinua nafatin no akompaña ho ai-han komplementar to’o tinan rua ka liu, fornese inisiu ida ne’ebé di’ak ba bebé no labarik sira ba moris ne’ebé diak.

Susubeen inan ne’e seguru no moos, no fornese enerjia no nutriente ne’ebé labarik sira presiza durante moris iha fulan balun nia laran.

“Susubeen inan sei kontinua fornese nesesidade nutrisionál no enerjia ne’ebé labarik sira presiza durante fulan neen tuir mai. Inisiasaun sedu fó-susubeen inan, durante oras ida nia laran hafoin bebé moris, proteje bebé foin-moris sira husi infesaun no moras króniku no hamenus mortalidade ba bebé foin moris,” nia esplika.

Fó-susubeen inan aumenta relasaun emosionál inan ho oan no fó impaktu pozitivu durante fó-susubeen inan eskluzivu.

Tuir dadus iha rejiaun Sudeste Aziátiku, taxa ba inisiasaun sedu varia, a’as liu maka pursentu 89 no ki’ik liu maka pursentu 42.

Nune’e, OMS kontinua suporta nasaun iha rejiaun sira hodi fortalese kapasidade hodi proteje, promove no suporta fó-susubeen inan, ne’ebé aliña ho prioridade hodi atinje kobertura saúde universál, prevensaun no kontrola moras la hada’et no aselera redusaun mortalidade inan, bebé foin moris no mortalidade iha labarik.

Iha tinan 2018, aprosimademente pursentu 54 hosi bebé iha rejiaun maka esklusivamente simu de’it susubeen inan to fulan-neen, kompara ho dadus husi tinan 2015 ho pursentu 47 no a’as liu tarjetu globál ne’ebé asegura katak iha tinan 2025 labarik ne’ebé simu susubeen inan esklusivu tenke atinje pursentu 50 durante fulan  neen nia laran.

Infelizmente iha rejiaun ida ne’e ba tinan tinan 2016 to’o 2017, bebé moris iha fasilidade óspital ne’ebé implementa óspital amigavel hadomi kosok-oan OMS no UNICEF nian iha de’it pursentu 5.

Ospital amigavel hadomi kosok-oan iha  objetivu hodi institusionaliza fó-susubeen inan iha sistema kuidadu saúde, ne’ebé foka ba implementasaun pasu sanulu fó-susubeen inan ho susesu no promove kontaktu kulit ho kulit, Kangaroo Mother Care, no laiha separasaun inan ho bebé nu’udar asaun hotu ne’ebé sei hamenus morbidade bebé foin moris no hasa’e sobrevivensia.

OMS identifka ona maneira balun ba nasaun iha rejiaun hodi aselera progresu atu proteje, promove no suporta fó-susubeen inan, no la husik, feto ida, labarik no bebé foin moris iha kotuk.

Dahuluk, lejisladór bele implementa no haforsa kódigu substitui susubeen inan, ne’ebé nu’udar prioridade ida husi prioridade seluk, ho objetivu limita promosaun produtu substitui susubeen inan entre pesoál saúde no iha fasilidade Kuidadu saúde.

Daruak, lider komunidade no saúde bele hasa’e konsiensia kona-ba benefisiu husi fó-susubeen inan, ne’ebé foka ba inisiasaun sedu no kontinua fó susu tuir nesesidade to’o tinan rua moris nian.

Datoluk, administradór fasilidade saúde no pesoal saúde sira bele antisipa ho di’ak liu-tan no responde ba nesesidade inan ho bebé, hanesan ezemplu fortalese akonselamentu  fó-susubeen inan antes inan isin-rua no durante programa kuidadu Antenatal, no implementa prátika óspital hadomi kosok oan no integra iha padraun kontrolo kualidade saúde.

Daha’at, mak saúde, polítiku, komunidade no lider empresárial bele mo’os suporta implementasaun polítika familia amigavel ne’ebé sei permite fó-susubeen inan, hanesan pagamentu lisensa maternidade aprosimademente to’o fulan 6, no protesaun sosiál bazea ba igualdade jéneru.

“Fó-susubeen inan nu’udar asaun natural, maibé mós nu’udar hahalok ne’ebé ita aprende. Inan hotu iha rejiaun tenke hetan apoiu hodi inisia fó-susubeen inan, imediata iha oras ida hafoin bebé moris, no tenke hetan apoiu prátiku hodi suporta sira estabelese fó-susubeen inan no jere difikuldade jerál kona-ba fó-susubeen inan nian,” tenik.

Fó-susubeen inan nu’udar ferramentu potente ba esforsu rejiaun ne’ebé hala’o dadauk hela hodi jere naha dupla ba má nutrisaun, no sei ajuda hodi hamenus risku kankru ováriu no susun.

“Ida ne’e nu’udar solusaun universál ba ema hotu hodi hahú moris ho justu, no sai hanesan fundasaun ba saúde di’ak no ba sobrevivensia feto ho labarik,” nia afirma.

Iha inisiu semana mundiál fó-susubeen inan, OMS hakarak reitera ninia komprimisiu hodi suporta nasaun iha rejiaun hotu hodi proteje, promove no suporta fó-susubeen inan, ba rejiaun Sudeste Aziátiku iha kada bebé foin moris no labarik sira sobrevive no prósperu.

Jornalista : Felicidade Ximenes

Editór          : Florencio Miranda Ximenes

iklan
iklan

Leave a Reply

iklan
error: Content is protected !!