DILI

MAE: fulan ida-rua tan semitériu Becuse nakonu ona

MAE: fulan ida-rua tan semitériu Becuse nakonu ona

Ministru Administrasaun Estatál (MAE), Miguel Pereira de Carvalho. Imajen/TATOLI.

DILI, 03 agostu 2022 (TATOLI)–Ministru Administrasaun Estatál (MAE), Miguel de Carvalho Pereira, hateten semitériu Becuse sei permite hodi hakohi mate maibé to’o fulan ida-rua tan ne’e, semitériu ne’e nakonu ona.

Notísia Relevante: Governu presiza dekretu-lei hodi antesipa muda semitériu ba Metinaro

“Semitériu Becuse iha fatin balun ne’ebé sei mamuk hela no permite atu hakohi ema ne’ebé mak mate, maibé ida-ne’e la dura to’o tempu naruk. Ha’u hanoin, fulan ida ka rua tan ne’e, semiteriu becusse nakonu ona,” Ministru Miguel de Carvalho Pereira hateten ba jornalista sira, iha Palásiu Governu, kuarta ne’e.

Governante ne’e hateten, daudaun ne’e halo hela kapela kiik-oan ida iha laran depois mak tama faze kontrusaun boot nian hanesan halo moru haleu semitériu ne’e.

“Konstrusaun ba semitériu ne’e kompañia nasionál ida mak kaer no daudaun ne’e halo hela kapela kiikoan iha ne’ebá,” nia dehan.

Entretantu Vise Ministru Administrasaun Estatál (MAE), Lino de Jesus Torrezão, hateten Governu presiza dekretu-lei hodi antesipa muda semitériu públiku ba iha postu administrativu Metinaro, munisipiu Dili.

“Prosesu semitériu Metinaro ne’e, daudaun ne’e halo hela kapela, hein de’it bainhira mak Governu atu dekreta iha dekretu-lei ruma atu ita iha legalmente mak muda semitériu púbiku ne’e ba iha Matinaro,” Lino hateten.

Maibé, nia dehan, esbozu iha ona maibé ida-ne’e sei ezbosu hela seidauk iha serteza atu lori ba Konsellu Ministru (KM), tanba ezbosu ne’e sei bele sai dekretu no sei bele mós ho diploma ministeriál.

Iha proposta Orsamentu Jerál Estadu (OJE) 2021 nian ne’e, prevee purvolta rihun $200 hodi fó indemnizasaun ba komunidade afetadu ne’ebé hela iha rai kuaze hektare 25 iha Matinaro.

Notísia Relevante: Tempu besik, Governu konstrui semitériu foun iha Metinaro

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!