DILI, 15 jullu 2022 (TATOLI)—Vise Ministru Administrasaun Estatál (MAE), Lino de Jesus Torrezão, hateten Governu presiza dekretu-lei hodi antesipa muda semitériu públiku ba iha postu administrativa Metinaro, munisípiu Dili.
“Prosesu semitériu Metinaro ne’e, daudaun ne’e halo moru halaeu, hein de’it bainhira mak Governu atu dekreta iha dekretu-lei ruma atu ita iha legalmente mak muda semitériu púbiku ne’e ba iha Matinaro,” Governante ne’e hateten ba Agência TATOLI, iha Ministériu Finansa, Dili, sesta ne’e.
Maibé, nia dehan, esbozu iha ona maibé ida-ne’e sei ezbosu hela seidauk iha serteza atu lori ba Konsellu Ministru (KM), tanba ezbosu ne’e sei bele dekretu no sei bele mós ho diploma ministeriál.
“Atu lori ba KM ne’e sei iha serteza tanba ita foin hahú. Signifika sei iha prosesu elaborasaun hela, atu iha dekretu do Governo ka diploma ministeriál, sei iha prosesu nia-laran,” nia dehan.
Governante ne’e haktuir, prosesu muda semitériu tuan ba semitériu foun iha Metinaro ne’e iha opsaun rua, ida mak sei dekretu do Governo no diploma ministeriál.
“Tanba ho semitériu Becusse ne’e ho diploma ministeriál. Entaun ho semitériu Metinaro ne’e tenke ita antesipa ka presiza dekretu-lei ida, nune’e bele muda tiha semitériu públiku ne’e ba Metinaro,” nia hateten.
Jornalista : Osória Marques
Editór : Cancio Ximenes
