DILI, 03 agostu 2022 (TATOLI)–Ministériu Edukasaun Juventude no Desportu (MEJD) no Ajénsia Dezenvolvimentu Nasionál (ADN) konkorda semana ne’e sei ko’alia kona-ba kontinuasaun projetu komunitáriu ba reabilitasaun eskola faze daruak.
“Ita iha ona akordu ho ADN kona-ba kestaun dedusaun ho retensaun nian, ne’ebé semana ne’e ita sei rezolve problema sira atu osan bele sai ona, nune’e ita bele kontinua hala’o projetu komunitáriu ba reabilitasaun eskola faze daruak,” Ministru Edukasaun Juventude no Desportu, Armindo Maia, hateten iha Palásiu Governu, kuarta ne’e.
Notísia relevante: MEJD enfrenta problema pagamentu projetu komunitáriu
Tuir governante ne’e, prosesu reabilitasaun sala aula sira paradu iha faze daruak tanba intervensaun ADN ne’ebé husu atu halo verifikasaun maka foin kontinua filafali.
“Tanba ne’e, projetu komunitária ne’e paradu to’o agora. ADN ninia hakarak tenke verifika tiha mak fó rekomendasaun hodi kontinua fali. Sira rekomenda mai ami atu labele fó 100%, ne’e duni ita halo ona akordu ho ADN atu buka solusaun ba kestaun ne’e,” nia akresenta.
Iha sorin seluk, Diretór Eskola Ensinu Sekundáriu Tékniku Vokasionál 28 novembru Becora, Pedro da Silva Ximenes, relata katak, sira seidauk kontinua halo levantamentu tanba osan faze daruak ba projetu komunitária seidauk aloka, enkuantu prosesu kontinuasaun reabilitasaun sala aula ualu inklui salaun ida, sala profesór ida no sala neen ba estudante sira seidauk realiza.
“Ami hatama relatóriu faze dahuluk nia iha fulan-maiu bazeia ba persentajen ne’ebé ami atinje ho valór 25%, maibé besik fulan-tolu ona osan la mai entaun ami paradu hela to’o agora,” nia tenik.
Bazeia ba totál osan ne’ebé eskola utiliza iha faze dahuluk sei kontinua simu mós hanesan iha faze daruak ho montante $35.000 resin, maibé ninia prosesu alokasaun fundu maka demora.
“Foin lalais ha’u kontaktu sira dehan hein de’it tanba besik ona, ne’ebé ami mós hein de’it,” nia dehan.
Jornalista : Tomé Amado
Editora : Julia Chatarina
