iklan

EKONOMIA, HEADLINE

MKAE simu relatóriu Cesta Bázika no nota iha infrasaun balun

MKAE simu relatóriu Cesta Bázika no nota iha infrasaun balun

Atividade distribuisaun Cesta Bázika faze daruak. Imajen/MTKI

DILI, 03 agostu 2022 (TATOLI)—Ministériu Koordenadór Asuntu Ekonómiku (MKAE) simu ona relatóriu balun relasiona ho distribuisaun Cesta Bázika faze daruak no nota katak mosu infrasaun balun.

“Relatóriu ne’ebé ita simu hatudu iha duni indikasaun balun hanesan iha Bobonaro, bainhira kompañia distribuidór fahe produtu, iha produtu balun hanesan koto-han sira a’at, maibé ita ho ekipa avaliasaun haruka troka ho sasán seluk hanesan mina-han litru rua,” Ministru Koordenadór Asuntu Ekonómiku, Joaquim Amaral, hataten iha Palásiu Governu, kuarta ne’e.

Nia dehan, distribuisaun Cesta Bázika daudaun ne’e la’o hela no ekipa avaliasaun no fiskalizaun envolve entidade sira hanesan Provedoria Direitu Umanu no Justisa (PDHJ, sigla portugés), Komisaun Antí-Korrupsaun (CAC, sigla portugés) no Autoridade Inspesaun no Fiskalizasaun Atividade Ekonómia Sanitária no Alimentár Institutu Públiku (AIFAESA, I.P).

“Bainhira iha distribuisaun produtu ne’e mak ekipa fiskalizasaun prova duni katak kompañia komete violasaun, maka presiza hetan sansaun hosi parte Governu, maibé depende violasaun ne’ebé komete. Tanba iha fallansu balun, sira rezolve kedas iha terrenu ne’ebé ita sei haree fó sansaun depende ba violasaun, medida ne’ebé ita bele foti ba kompañia sira, maibé daudaun ne’e ita seidauk iha dadus kompañia ne’ebé komete irregularidade maka’as,” nia akresenta.

Notísia relevante: MTKI konklui ona distribuisaun Cesta Bázika ba benefisiáriu 19.478

Tuir Ministru daudaun ne’e parte MKAE haree kazu sira ida pur ida no laiha intensaun atu jeneraliza kompañia sira.

Responsável distribuisaun Cesta Bázika kobre ona ba munisípiu haat no aban sei kontinua lansa hahú hosi Ainaro to’o Covalima, maibé ba parte leste nian seidauk.

“Ita hein semana oin responsável Cesta Bázika sira bele aselera selesaun kompañia sira, númeru ne’e barak ona atu nune’e kompañia idaidak bele hala’o ninia serbisu. Ha’u husu mós ba kompañia sira ne’ebé fahe ona produtu antes ne’e, tenke insentiva imi-nia serbisu tanba ita haree distribuisaun ne’e ritmu seidauk a’as,” nia dehan.

Antes ne’e, Governu liuhosi reuniaun Konsellu Ministru, aprova ho alterasaun, medida distribuisaun Cesta Bázika ba família timor-oan sira ne’ebé presiza liu no apoiu operadór ekonómiku lokál bele kria rejime espesiál kona-ba aprovizionamentu, iha ámbitu planu rekuperasaun ekonómiku.

Ho projetu Dekretu-Lei ne’e, Governu hakarak kontinua fó produtu nesesidade dahuluk no garante sustentabilidade família, ne’ebé iha tempu hanesan atu kria kondisaun normalidade ba atividade produtór no operadór ekonómiku nasionál sira tanba prokura menus.

Ministériu implementadór  ba Cesta Bázika faze daruak ne’e maka Ministériu Turizmu Komérsiu No Indústria (MTKI) ho totál kustu millaun $40 no Sekretaria Estadu Kooperativa (SEKoop) ho totál kustu millaun $40.

Produtu ne’ebé admite ba programa ne’e mak hanesan produtu ai-han ne’ebé iha karboidratu, proteína no vitamina inklui sasán ijiene pesoál no ijiene fememinina.

Cesta Bázika faze ne’e fixa ho montante $50 ba kada ema hosi membru agregadu familiár benefisiáriu ne’ebé ho rendimentu mensál boot liu $500, enkuatu antes ne’e sidadaun iha territóriu laran sai benefisiáriu hotu ba Cesta Bázika faze dahuluk.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!