VIQUEQUE, 03 agostu 2022 (TATOLI)—Diretór Telkomsel iha munisípiu Viqueque, Januário Soares, informa, ekipa Telkomcel hahú halo ona introdusaun pagamentu uza sistema dijitál TPAY ba abitante sira iha munisípiu Viqueque.
“Ami daudaun fahe informasaun kona-ba sistema dijitál TPAY hosi Telkomcel ba abitante sira iha munisípiu Viqueque hodi limita movimentu ba munisípiu atu foti osan. Sistema ne’e foin mak uza iha Viqueque, maibé iha Dili ema komesa utiliza ona,” Diretór informa ba Agência Tatoli, iha Viqueque vila, kuarta ne’e.
Telkomcel liuhosi ninia programa TPAY hanesan sistema modernizasaun ida hodi halo pagamentu, ezemplu hanesan funsionáriu sira ne’ebé hela iha área rurál bele foti osan besik iha sira-nia postu no la presiza hakat ba banku iha munisípiu Viqueque.
“Ho sistema dijitál ne’e ita bele minimiza ona movimentu funsionáriu sira no fasil atu halo tranzasaun osan ba oan sira ne’ebé maka eskola iha Dili. Atu minimiza movimentu sira-ne’e maka ami utiliza sistema ida-ne’e hodi tranfere osan liuhosi dijitál,” nia akresenta.
Notísia relevante: BCTL introdús pagamentu dijitál ba autoridade no funsionáriu iha Uatulari
Fasilidade ne’e transfere osan ba banku no banku mós bele halo transfere osan, nune’e mós sosa pulsa eletrisidade no ba loja sosa sasán bele liuhosi sistema TPAY hodi halo tranzasaun.
“Tanba ne’e, ami halo introdusaun sistema ba komunidade no funsionariu sira, atu sira bele hatene uza. Kona-ba dadus utilizasaun sistema iha munisípiu Viqueque to’o agora seidauk. Atu utiliza sistema ne’e, kliente sira ba edifísiu Telkomcel iha munisípiu Viqueque hodi ami bele ajuda halo rejistrasaun sistema TPAY no halo koneksaun ba banku, atu nune’e kliente sira bele dada osan,” nia tenik.
Kritériu atu sai kliente ba sistema ne’e tenke iha kartaun eleitorál ka billete identidade halo rejistu, bele uza kualker sim card hosi operadór telekomunikasaun tolu ne’ebé eziste iha Timor-Leste.
“Ami husu komunidade iha munisípiu Viqueque, liu-liu komunidade ne’ebé hela iha área rurál di’ak liu uza sistema dijitál hodi minimiza movimentu,” nia sujere.
Jornalista : Vitorino Lopes da Costa
Editora : Julia Chatarina
