HEADLINE, LEI, NASIONÁL

ANE, I.P halo diskusaun esbosu dekretu-lei enerjia renovável

ANE, I.P halo diskusaun esbosu dekretu-lei enerjia renovável

ANE, I.P no EDTL, E.P, halo diskusaun esbosu dekretu-lei enerjia renovável, iha Suai Room, Timor Plaza, Kinta (04/08). Imajen Tatoli/Egas Cristóvão

DILI, 04 agostu 2022 (TATOLI)—Autoridade Nasionál Eletrisidade, Institutu Públiku (ANE, I.P) realiza workshop ho parte relevante sira, kinta ne’e, hodi halo diskusaun ikus kona-ba esbosu dekretu-lei enerjia renovável molok aprezenta ba Governu.

Prezidente ANE, I.P, Ruben Jerónimo Freitas. Imajen Tatoli/Egas Cristóvão

Prezidente ANE, I.P, Ruben Jerónimo Freitas, hateten, diskusaun ne’e importante tebes tanba dekretu-lei ne’e hakarak regula setór enerjia renovável iha Timor-Leste.

“Ohin ita halo diskusaun ikus ba esbosu dekretu-lei enerjia renovável antes lori ba Governu tanba ita hatene katak enerjia renovável ne’e potensialidade a’as tebes iha Timor-Leste, entaun ida-ne’e apar mós ho polítika Governu nia, ne’ebé hakarak dezenvolve setór enerjia,” Ruben Prezidente ANE, I.P relata iha Suai Room, Timor Plaza.

Notísia relevante: UNTL Parseria Ho JICA Dezenvolve Peskiza Ambientál No Enerjia Renovável

Lejizlasaun ne’e atu regula atividade enerjia renovável iha Timor-Leste hanesan investimentu, lisensa, sertifikasaun ba kompañia sira, no seluk tan.

“Ha’u fiar katak hafoin ita halo diskuasaun no lori ba Governu, sei esforsu tomak atu aprova lei ida-ne’e tanba Governu fó importánsia maka’as ba setór enerjia renovável, liuhosi esbosu lei ida-ne’e, ita bele fó biban ba setór privadu sira hotu hodi halo parseria ho Governu bele investe iha enerjia renovavél sira ne’e,” nia akresenta.

Sesaun foto hafoin diskusaun esbosu dekretu-lei enerjia renovável, iha Suai Room, Timor Plaza, kinta (04/08). Imajen Tatoli/Egas Cristóvão

Bainhira investe iha enerjia renovável maka sei redús kustu produsaun, nune’e bele afeta mós ba redusaun tarifa nian.

Programa ne’e sei dezenvolve iha futuru, ne’ebé kobre fonte enerjia renovável hotu kedas hanesan loro-matan, anin, bee, biomas no mós enerjia sira seluk tuir lei bele konsidera hanesan fonte enerjia renovável.

“Bainhira implementa enerjia ida-ne’e maka bele kompleta ho enerjia ne’ebé daudaun ita uza tanba daudaun ne’e ita depedénsia ba konvensionál ne’e sei a’as, tanba ne’e ita investe nune’e ba oin teknolojia sira ne’e la’o di’ak no ita bele subtitui fonte enerjia konvesionál sira,” nia tenik.

Esbosu ne’ebé daudaun halo diskusaun ne’e hamutuk artigu 49, neebé inklui ona ho lei komplementár sira.

“Sei iha filafali esbosu lei komplimentár ne’e liuhosi diploma ministeriál ne’ebé regula epesífiku oinsá halo esplorasaun iha fonte enerjia hanesan loro-matan, anin, bee no seluk tan,” nia tenik.

Esbosu kona-ba enerjia renovável ne’e halo konsultasaun hahú iha tinan kotuk no serbisu hamutuk United Nations Development Programme (UNDP) no ANE, I.P ho totál orsamentu $14.000.

Prezidente Konsellu Administrasaun EDTL, E.P, Paulo da Silva. Imajen Tatoli/Egas Cristóvão

Iha biban hannesan, Prezidente Konsellu Administrasaun Eletricidade de Timor-Leste, Empreza Públika (EDTL, E.P), Paulo da Silva, hateten, lei enerjia renovável hanesan pasu di’ak ida atu ajuda Timor-Leste nia asaun sira tuir mai.

“Liuliu ba realizasaun polítika liga ho setór eletrisidade espesífikamente ba enerjia alternativu, ita iha lei ida-ne’e tanba ita iha nesesidade ne’ebé obriga ita tenke oriente ba enerjia renovável,” nia dehan.

Timor-Leste nia despeza kada tinan boot tebes utiliza fonte enerjia ezistente ne’ebé iha parte seluk iha rekursu alternativa ne’ebé bele esplora hodi ajuda hatun kustu no mós kontribui pozitivamente ba ambiente.

Entaun lei ne’e pertinente no pasu di’ak ida hodi fó biban ba EDTL, E.P hodi halo intervensaun tuir polítika ne’ebé iha.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!